小初前日提過華瀚生物製藥（587）及TCL國際（1070）可以炒業績，噚日華瀚股價微升1%，收0.98元，TCL則平收1.90元，未見大幅炒上。經紀陳話，港股噚日跌成152點，兩隻股有咁表現，已經好有交代。小初即管睇吓今日兩股公布業績後，短期內會否有表現。
至於亦係今日公布中期業績嘅亞洲鋁業（930），經紀陳話，隻股業績應該唔錯，或可借機炒一轉。
亞鋁噚日表現好靚仔，逆市升5.1%，收0.82元，又升近今個月高位，成交金額亦有797萬元。
雖然亞鋁上次公布全年業績平平，但有人估今次中期業績會好到你唔信，皆因過往嘅收購項目，終於為公司帶來盈利，今次據聞賺超過1.50億元，而且傳聞會派高息利誘股民。
小初知道公司近年極為努力搞好與投資者關係，早排有芬佬捧場攞貨，若然今次業績對辦，相信有機短炒一轉。
慕容小初