本田Accord呢個名字，相信大家唔會感到陌生，但大家又對佢過往歷代型號嘅大小事情又知道幾多呢？不如今日就趁第七代新車未正式在港推出前，一齊嚟回顧吓Accord多年來嘅發展歷程，從而了解關於佢嘅更多啦！
記者：鄭達基
70年代爆發嘅全球能源危機，令世界各地政府、人民，以至商人都大感頭痛；而本田於推出第一代Accord後，便不斷進行研究同發展，務求達到有低耗油量及廢氣排放嘅優點；另一方面，廠方亦已開始緊遵「以人為本」嘅造車信念，以求令生產出來嘅汽車，能夠為駕駛者帶來舒適體驗。事實上，第一代Accord已有齊多項先進配備，例如復合渦流調速燃燒（CVCC）引擎、備有Overdrive模式嘅HondaMatic自動波箱等等；另外，新車更榮獲MotorFanMagazine推選為全年最佳汽車，而銷售量更高達一百萬部㖭！
於1981年推出嘅第二代Accord，備有多項卓越配備，除咗有劃時代嘅巡航控制系統、自動調節高度嘅懸掛系統、12氣閥橫流式引擎及四輪防鎖死制動系統等等外，後期於市場推出嘅版本更備有HondaMatic自動波箱、離合器鎖定機制（Lock-upmechanism）同埋PGM-F1電子控制燃油噴注系統，從而令新車有更佳表現。
雖然新車推出時，全球能源危機已告一段落，但本田仍努力推出更多新發明，以求令新推出車款有更強勁動力輸出之餘，同時亦能減低耗油量，從而為車主節省開支。
本田於80年代中至後期，於一級方程式賽場上橫掃千軍，可謂鋒芒畢露！而廠方更將呢股澎湃力量放於第三代Accord車系身上（包括掀背式房車、四門房車及雙門轎跑車版），甫面世便備受追捧，並於1986年全球銷量超過三百萬部，以及獲得1985至1986年日本最佳汽車殊榮。
其中於1985年6月推出嘅房車版本，創造咗汽車全新嘅價值定位；造型獨特之餘車廂空間又見闊落，引擎配搭更見動力充裕，加上多項先進配備（如三路數碼控制輪防鎖制動系統等等），以滿足要求日高嘅用家需要。1987年7月又推出AccordCA版與車迷見面，到咗1988年4月更推出由美國俄亥俄州製造、兼屬Accord車系首部嘅雙門轎跑車，同樣成為車迷追捧對象。
第四代型號可稱得上係Accord邁進多姿多采新世代嘅車款，並將「以人為本」嘅精神發揚光大；皆因廠方響新車設計上作出徹底革新，例如配用四輪轉向系統、安全氣袋、附有第二代平衡器嘅引擎（2ndgenerationbalancer-equippedengine），以及Multi-filter石英車燈等先進配備，就係最佳嘅證明，從而亦令Accord全球嘅累積銷量跳升至五百萬部。
而響1990年4月及1991年4月，本田為Accord車系分別推出雙門轎跑車版及首度推出旅行車版本；當中由美國分部負責設計、開發及製造嘅美國版Accord旅行車，除以一台2.2公升偈作動力核心外，另外重配有多項先進及安全配備，因而令其頗受用家歡迎。
1993年推出嘅第五代Accord，廠方提供有2.2公升全新VTEC或2.2公升DOHCVTEC偈供用家選擇，並附以智慧型4前速自動波，性能表現強而有勁；另外重有多項先進技術及安全配備，難怪新車於1993至1994年榮獲日本最佳汽車嘅殊榮，以及1994至1995年美國人車誌十大好車獎項啦！然而，其後推出嘅雙門轎跑車及旅行車版本亦備受追捧。截至1997年6月，Accord全球累積銷量已超過九百萬部呢！
Accord第六代型號於1997年9月面世，而且重成為全球暢銷車款之一㖭！新車無論豪華及舒適程度，以及性能表現都較舊有型號來得更好，而其安全裝置更獲得美國NationalHighwayTrafficSafetyAdministrationProgram，頒發五星評級榮譽㖭！
第六代Accord房車擁有強勁動力輸出，全新設計嘅五連桿雙搖臂懸掛組合、電子動力軚盤（EPS+VGR）、S-Matic自動波箱，以及多項改善駕駛享受嘅科技，從而予人有更佳嘅操控表現；而一台符合低廢氣排放（LEV）標準嘅引擎，以對保護環境盡一分力呢！另外，同年10月廠方亦推出全新旅行車版本，以滿足用家需要。
雖然第七代Accord嘅日本版及歐美版已推出，但本港車迷最快都要待至今年年中，才有機會與之見面；抵港型號將屬美國版本，並於本田喺泰國嘅生產線製造。新車造型吸引之餘，闊落車廂空間及齊全設備亦為賣點之一；據聞抵港發售嘅新Accord，將有2.4公升及3.0公升型號供用家選擇，兩台偈不但輸出強勁，兼且重有低耗油量嘅特性，有興趣嘅車迷就要拭目以待喇！