蔡志明的旭日集團前晚慶祝三十周年，其紅顏知己陳妙瑛出席成為全場焦點，蔡志明大讚陳妙瑛做生意好叻女，而蔡太亦表示和陳妙瑛很老友，又讚她勤力，兩人都畀足面陳妙瑛。
蔡志明的旭日國際集團前晚在會展舊翼舉行2003晚宴，以及慶祝成立三十周年，由英皇一眾歌手包括陳奕迅、Twins、3T和Boy'Z擔任表演嘉賓，而出席的嘉賓除有蔡志明紅顏知己陳妙瑛，還包括廖碧兒、向華強夫婦和兒子向展平、應采兒、張文慈以及楊受成夫婦等。
陳妙瑛以一身白色套裝到場，對於記者所有問題都笑而不答，而蔡志明則大讚公司有此成績全靠太太在背後支持。蔡志明亦讚陳妙瑛做生意叻，將公司打理得好好，問兩人傳緋聞，見面可會感到尷尬，蔡志明說：「傳之嘛！」而其太太即時插口說：「我都識得佢㗎，我哋係朋友，成日一齊食飯，佢個人好好、好勤力。」
而向太到場時，記者表示楊受成已在場，向太說：「我有同佢打招呼，我之前唔係鬧佢，我鬧佢本雜誌啫！」談到楊受成旗下將有新雜誌出版，向太說：「冇嘢㗎，唔做佢訪問咪得咯！」問及她旗下女藝人應采兒被胡敏珊前男友毛志輝鹹豬手一事，向太說：「摸頸之嘛，又唔係摸胸，乜佢（毛志輝）俾人打咩？同呢件事冇關啩！」
張文慈前晚穿着性感，她說：「我好耐未試過咁性感，我呢排忙緊拍《黑白森林》，要化老妝，唔知點解我做戲成日有機會化老妝、做人阿媽，但現實生活我自問就冇能力做阿媽嘞，生仔呢啲嘢隨緣啦！」
採訪：顏英儀
攝影：何國豪、甄朝健
