星期四中午，喺大馬路行咗十分鐘，都唔見報攤有《壹週刊》賣，與老友記食完飯，再行多一陣，仍然唔見，唔通《壹週刊》脫咗期，卒之唔抵得，行去一檔最相熟嘅報攤，問檔主：「壹仔壞機呀？出唔到咩？」檔主大笑：「你遲咗咯，一早賣晒！」咁巴閉，用乜做封面呀？梗係大罵梁錦松，觸動中環賓架神經嘞。
檔主話：「你錯咯，今期係鬧梁錦松，但BookB封面劉嘉玲最煞食，故此好多人搶購。嗱，我重剩番二十本。應酬熟客查問嘅，你若果要，畀本你！」好奇心起，即磅二十皮，攞壹仔一睇，咦，舊料新包裝啫，冇乜特別，咁都賣個滿堂紅（最少中環如此），肥佬黎真係行運。
想落香港人飽受「風流之車，折墮之選」嘅零智折磨，冇乜心機睇嚴肅分析，愛睇八卦明星內幕，是故今期壹仔暢銷。咪以為香港人水平低，鍾意睇cheap嘢，其實全世界都一樣。德國門將、著名球星簡尼趁老婆大肚而蒲吧，戀上婚外情嘅新聞，轟動德國，報紙日日頭版報道，爭取銷路，唔通德國人冇水平咩，出產叔本華、黑格爾、康德、尼采嘅國度，品味一定唔cheap，但仍然追睇「簡尼醜聞」，反映咗乜嘢社會現象呢？目前德國失業率係雙位數字，經濟連年不景，總理施羅德民望大跌，要靠反戰反美嚟爭取民意，處境與董特首差不多，德國人與香港人同樣苦悶，八卦新聞就受歡迎嘞。