阿虎早就預咗阿董一定攬實阿松，不過佢挺松嘅方法怪誕之極，唔通阿董真係可憐到身邊一個謀臣都冇，否則又點會一方面批評阿松嚴重失責，卻又要出手挽留？其實阿董大可堅持相信阿松係無心之失，反正有心定無意根本好難證實，咁簡單嘅事，阿董竟處理到前後矛盾兼破綻百出，簡直羞家死人，破壞晒香港國際金融中心嘅形象。
市場傳出本周美伊開戰，投資者計數離場，港股當然偏軟無力，恒指收報8804，跌152點，成交42.81億元，亞洲股市更是全面下挫。
國泰（293）受到油價高企及非典型肺炎雙重打擊，股價大跌近4%，收報10.90元。
今次非典型肺炎相當惡搞，暫時冇藥物可以根治，連藥物股都冇得炒。新加坡及台灣來港旅行團有約10%取消，有10%押後，為本港經濟復甦再添陰影，香港呢排都可算衰到貼地。
聯通（762）跟隨中移動（941）喺成都搞單向收費，結果股價跌4.4%，收報4.325元，成交達4285萬元。中移動亦難以幸免，股價跌3.1%，收15.70元，成交達2.5億元。中移動今日能否反彈，主要視乎派息能否滿足投資者。
錦興集團（275）噚日通過併股，40股合併為1股，股價隨即再大跌23%，跌至「跌無可跌」嘅1仙收市。
今日併股正式生效，換言之，又提供下跌空間，股價再大跌絕不為奇。公司管理層表示冇集資需要，不過公司手頭現金只得1.56億元，而今年要還債6億元，財政壓力不小，相信併股後，供股配股會陸續有來。
阿虎