用ICQSendSMS講都講咗好耐，羅新基以前都試過，不過都係得一兩個台得，其他都重係未得。但自從上個禮拜開始，ICQSendSMS就可以打通六個台，只要喺Send之前Set好ICQ入面個手提電話號碼，就可以直接SendSMS，而且中文SMS都一樣冇問題，以後大家玩SMS就可以慳番唔少錢。
前個禮拜SonyEricsson先發表T610同T310，同時發表咗幾樣配件，不過當中嗰款收音機Handsfree話咁快就已經有水貨到港，羅新基上個星期喺先達都見到唔少舖頭有得賣，諗住得閒就走去買番個，點知噚日喺先達行咗幾個圈先見到得番一間舖有貨，估唔到SonyEricsson連收音機都咁鬼好賣。
上個禮拜羅新基都提過Nokia7250有幾隻顏色，其中重有隻紫黑色話同高達好似樣㖭，不過呢頭講完，嗰頭代理就做嘢，除咗幫佢起咗個名叫「紫羅蘭」之外，重會喺聽日周圍送紫羅蘭畀人㖭，送花幫手機做宣傳，都幾有噱頭噃！想攞花就喺以下時間到以下地點啦！
上午8:30：尖沙嘴(清真寺)、金鐘(金鐘廊)、中環(滙豐銀行)
下午12:30：灣仔(天橋)、太古坊、旺角(銀行中心)、銅鑼灣(崇光百貨)
文：羅新基