上周鄭中基牛一，有傳千嬅送上卡地亞銀戒指作為訂情禮物。前晚鄭中基在電視城出席《博愛》騷時，自爆銀戒指掛在頸上，當他自知失言後，馬上反口指銀戒指是《獎門人》所贏的獎品。
鄭中基（Ronald）與楊千嬅舊情復熾的消息傳來傳去，前晚Ronald在清水灣電視城為《博愛歡樂傳萬家》演出時，當記者向他提起千嬅時，Ronald總是笑到見牙唔見眼，未知他是否一時興奮，竟自爆千嬅送給他的卡地亞銀戒已掛在頸上。
上周Ronald牛一，日前有報道指千嬅送了一枚卡地亞銀戒給他作為訂情之禮，而Ronald就索性將它掛在頸上。前晚記者問Ronald時，他竟下意識用手遮住掛在胸口上的頸鏈，並說：「有呀，喺度呀。」
語畢Ronald自知失言，記者亦笑他講錯話，不過Ronald即死撐說：「點會講錯嘢？唔係你哋咁諗㗎，隻戒指係我玩《獎門人》贏番嚟㗎。」
近日有報道指Ronald與梁朝偉輪流𠝹陳勳奇女兒陳開心，Ronald聞言即說：「當日我係約咗偉仔飲嘢，佢同我補祝生日，入到去撞到陳開心啫，我哋識，但唔熟，但後尾我哋都有坐低一齊飲嘢。」問他是否有意𠝹對方？他說：「邊有呀？對呢啲報道都慣咗，唔需要介懷。」
此外，楊千嬅日前在台灣為最新國語碟《揚眉》舉行簽名會，台灣近日發現有非典型肺炎的病例，千嬅表示每日都帶備對呼吸系統有幫助的維他命丸傍身。千嬅並表示當她知道爆發非典型肺炎時，她即時戴上口罩防菌，更要求工作人員戴口罩，減低細菌傳染。
採訪：胡比、王祟穎
攝影：何國豪、陳慧安
