講起「3G」，恍若選擇題般只得以下兩種回應：「我都想買番部！」、「你想噏3T呀？」！但偏偏今日不是說手提電話、更非3T的錯體，而是樂壇又一新女子組合的名字！成員有Crystal、Rie和Vonnie三位美少女，至於GforGeneration，代表年輕一代。儘管面孔陌生，各自努力炮製三道「G」字菜式，希望由今天起有人認得出這是樂隊名字！
記者：吳佩璇攝影：陳陶鈞
鳴謝：healthfitkitchen（25459886）
嶄新組合來自模特兒公司Stareasy旗下的一個新Team──StareasyWorkshop，而3G就是公司的頭炮。何以偏偏選中她們三個？話說試音時素未謀面的三個女孩，走在一起就雞啄唔斷，想必是最佳拍檔！首張EP《我要造勢》由滾石唱片發行，預計4月頭出街。
雖趕上樂壇組合風這班車，但同樣的三名女孩難免被人話抄襲！3G異口同聲：「我哋係一隊組合，唔係獨立發展。加上樂壇應該可以同時存在唔同類型嘅歌手，冇話邊個抄邊個。」
畢業於港大繙譯系的Crystal，本來已踏足公關行業做OL。適逢所屬的模特兒公司打算在樂壇分杯羹，便膽粗粗一試：「我有學歷，第日要搵番份工唔難，但難得有機會喺樂壇發展，就要趁後生試。」自小喜歡唱歌的她，由中學到大學都不停參加歌唱比賽，成績最好的一次獲校內亞軍。目標希望能有偶像楊千嬅及孫燕姿的成績。這次她選了個MousseCake來表達自己。事關三女中以Crystal最甜最斯文，整甜品就最啱。
Crystal梁寶琪：提子MousseCake甜得嚟又唔膩，好好味！
材料： 青提 半磅、棉花糖 1包、牛油 3/4杯、魚膠粉 1盒、脫脂奶 半杯、奶油 250ml
、麵包屑 4杯
阿Rie當上歌手，是最老套的陪太子讀書，結果自己跑贏的橋段。當日Rie陪朋友試音，結果就被選中！雖也有做模特兒的經驗，但無心插柳，Rie是三人中最Cool和慢熱的一個。回想去年尾在滾石十周年AnnualDinner上首次作自我介紹時，口震兼腳震，好不難忘！因此別給她的Cool樣誤會，實際上好鬼好動，長跑、田徑都是強項。所以外表冷，食落甜的啫喱凍就最能代表Rie！
Rie呂盈盈：個啫喱凍酸酸甜甜，又夠冰涼，就嚟夏天最啱食。
材料： 青蘋果汁60cc、魚膠粉15g、青蘋果半個（切粒）
幼稚園開始就學芭蕾舞，到後來學中國舞、HipHop……憑着一身好「舞」功及活潑性格，在有線VJ比賽中勇奪亞軍。先後當過YMC台VJ、模特兒及拍攝麥當勞廣告等。成員中亦以她最富演出經驗，曾在大銀幕夥拍阿Sa做《我老婆唔夠秤》。「我飾演阿Sa嘅同學，有一場打籃球蝦碌戲，我哋成班女仔唔小心碌晒喺地，阿Sa就啱啱壓住我！完場嘅NG片都有播。」今次示範這道充滿辣味的傳統匈牙利牛肉，正好反映其熱情性格。
Vonnie雷凱欣：個牛肉好夠味，辣辣哋又醒神！
材料： 牛肉2磅、馬鈴薯粒4杯、洋葱2個切粒、紅椒粉2湯匙、月桂葉2片
雖然出街重未有人識，但三個美少女齊齊行街巿就無往而不利。今日我哋嚟到中環嘉咸街街巿買材料，所有舖頭見係靚女都任影唔嬲，更有舖頭老細係咁追問佢哋係乜嘢明星！
講番買餸，除Rie較少煮食外，Crystal同Vonnie都話鍾意買餸煮飯。特別係Vonnie，不但日日買餸，重鍾意行街巿多過超巿：「街巿抵啲又新鮮啲。深水埗街巿最平靚正，加上我婆婆住嗰頭，我成日都去嗰度買餸煮兩味畀婆婆食！」有紋有路，邊個話後生女唔識買餸煮飯？