趙飛雲倉內嘅恒指Put輪自從3月3日被震落車後，口雖然繼續唱淡，但遲遲未有行動，其實主要係怕失去先機後，如不計值博率追入Put輪，一旦遇上類似上周五的大挾倉行動，到時左一巴右一巴打窒條氣，真係可能有排衰。
其實稍有經驗嘅股民都知道，炒股票係收集與派發嘅遊戲，如果市場出現一面倒睇好或睇淡，大戶根本無法搵對手，惟有要跟散戶對着幹，所以在大市整體趨勢向淡或向好下，仍間中出現反走勢。上周四美股杜指急升近4%，主要是持短線淡倉投資者爭相平倉，互相踐踏所致，急升過後若無實質買盤支持，很快又會回復跌勢。
上周五美股走勢大致企穩，杜指表現較佳，再升37點，收7859。杜指進一步重上20日線（現處7814）之上收市，但未升破短期降軌7880及頸線8130前，只能視作後抽。
港股近期走勢又恢復落後外圍的情況，主要是基本因素較差。上周四再創出熊市收市新低是一個相當利淡訊號，上周五雖然跟隨外圍反彈，但成交明顯跟升勢不配合，亦是以後抽視之。恒指回升168點，但技術形態上未出現改善，除非這幾日出現大成交升破橫行區底部9029，才有望扭轉劣勢。現時趁反彈買恒指Put輪，仍是短期策略。
上周五在0.27元買入嘅意科（943）略有微利，估計可向0.30元進發。雖然意科不是恒指成份股，恒指上落對其無直接關係，不過大市若急速回頭，亦要考慮計數。
趙飛雲