早幾日KylieMinogue前男友JamesGooding接受英國《世界新聞報》訪問嘅時候，大爆Kylie為人自私，靠男人上位，而且性觀念好開放喎。不過原來James欠緊稅局唔少錢，佢可能想乘機爆料撈番啲油水！
我羅拉聽聞話James已經成三年冇交稅，加加埋埋爭落四萬八千英鎊（約五十八萬港元），𠵱家俾嗰邊稅局追到氣咳，所以有傳聞話經濟拮据嘅佢接受報章訪問，大爆同Kylie之間嘅嘢，就可以有十萬鎊（約一百二十萬港元）嘅酬勞，如果係真嘅話，咁就唔止可以解燃眉之急喇。
另外，James又繼續大爆佢同Kylie一齊嗰陣嘅性史，佢話當年Kylie同佢慶祝二十五歲生日，送咗個露營用嘅帳幕畀佢，跟住佢哋兩個去到荒山野嶺搭起個營，繼而喺入面翻雲覆雨㖭！
除咗Kylie俾人爆大鑊之外，佢嘅新歡奧利華馬天尼斯（OlivierMartinez）亦不遑多讓，曾經同美娜蘇雲露（MiraSorvino）拍拖嘅奧利華，佢個初戀女友ClotildeCourau早幾日接受訪問，話奧利華未紅嗰陣，兩人住喺巴黎一個細單位，雖然嗰時冇人識，但係反而重開心㖭！佢重話Kylie係一個可愛嘅女仔，希望奧利華同佢可以開心咁生活喎。