自從經常北上後，很多朋友都問我深圳邊度可以買到仿古家具？幾經打探下，終於在華強北路發現了一間專賣仿古家具的店舖，店內的家具款式，雖然同灣仔和西貢所賣的差唔多，不過價錢起碼平約三分一至一半，而且每款只有一件，睇啱就要快手！今次在店舖直擊各位顧客有何心水推介，不妨作為參考！
記者：歐嘉荃 攝影：陳星
Model：HaiesfromSunSpot
老闆娘吳小姐話港客最愛這些玻璃枱燈，連Haies都話要買盞返香港。「這些燈的售價比香港差不多平一半，聽老闆娘講，燈的玻璃罩全由人手製成，手工夠晒精細，顏色鮮豔，作為家居裝飾品就最好不過。」
尺寸：約13至30吋高
售價：?130至?1,500
店內的鐵家具的確幾受歡迎，好似呢個鐵生果盆便是當中的表表者。生果盆全個用上鐵銹色，感覺好懷舊，配上向日葵的裝飾，的確幾高貴！顧客曾小姐便睇中這個生果盆，「今次係我第一次嚟呢度，覺得呢度所賣的家具幾特別，好似呢個生果盆，款式唔錯，我就幾鍾意，不過要問問老公好唔好先至買。」
尺寸：約12吋高
售價：?50
在店內差不多逗留了個多小時的許小姐，原來是熟客仔，「今次睇中呢個相架，覺得佢啲雕花手工好靚！」許小姐睇中的兩個相架，木料經過特別處理，前面的一個加了立體的雕花點綴，而後面的相架則有雕通了的花紋，兩者各具特色。
尺寸：約10吋高
售價：?60（前）??95（後）
採訪時遇到另一位熟客王小姐，佢帶埋囡囡嚟買電話几，「我覺得呢度啲仿古家具好有品味，我姑仔住喺香港，特別鍾意呢啲仿古家具，所以我經常會嚟逛逛。今次我揀中呢個電話几，諗住運落香港畀我姑仔。」王小姐邊揀邊答。呢個電話几全個用鐵製成，腳架更有數塊楓葉點綴，王小姐重用佢三寸不爛之舌，將電話几由?70講價講到?30，的確抵買！
尺寸：約27吋高
售價：?30
經過店舖被門前雀籠吸引住的丁先生：「我啱啱經過，覺得個雀籠設計成間屋咁，幾得意！我覺得放喺屋企作為裝飾品都唔錯！」雀籠由幼身的木枝嵌製而成，老闆娘話最考功夫便是弧形的頂部及拱門，?50一個的確幾抵。
尺寸：約20吋高
售價：?50
若然你是仿古鐘的擁躉，這裏絕對是你的小天堂。皆因全店有成十幾款仿古座枱鐘，而且款款不同，絕對可以慢慢揀！喺咁多個鐘裏面，我就最鍾意呢個，老闆娘話呢個鐘所用的木經過特別處理，雖然感覺霉霉舊舊，但卻可防蟲，的確令我意想不到。除了木質感覺夠正外，我最欣賞略帶雲石感覺的鐘面，感覺如英國的古老大鐘，個Feel幾正。
尺寸：約15吋高
售價：?150
呢個三層几係我嘅心水推介，全個架用粗鐵枝屈成，款式夠晒優雅，層架用藤編織而成，一柔一剛的配搭，發揮出不錯的化學作用。令我最欣賞的，就是圓形的層架可以轉動，設計頗有心思！
尺寸：約31吋高
售價：?180
店內其實有好多過癮的家品，好似呢個蠟燭台，雖然擺放在一角，但卻能引起我的注意。全個燭台用鐵枝以人手屈成龜形，像真度極高，而龜的腳下更踏着一塊上了漆油的木塊，手工精細之餘，款式又夠特別。
尺寸：約8吋高
售價：?80
丹尼鳳
地址：深圳華強北路嘉華廣場兒童街17號舖
電話：(86)13682370215
營業時間：10:00am-10:00pm