每次講到二十三條立法，以前揸的士嘅夏其龍神父總係妙語如珠。噚日夏神父喺教區一個內部研討會上，講到內地以危害國家安全為名取締一個組織之後，香港政府都可以取締香港嘅附屬組織；夏神父突然問吳靄儀，如果香港有個組織幫政府做咗啲嘢，香港政府取締咗佢，咪唔使畀錢囉！
吳靄儀俾夏神父咁樣一問，都笑到答唔到，只係話政府如果係咁就好「狼」嘞。不過八方就真係佩服夏神父，咁都俾佢諗到，取締組織原來都係政府一個節流好方法喎！
之後夏神父又話，噚日佢喺堅道揸車去黃大仙出席研討會之前，見到一條支持立法嘅橫額，寫住「沒有國，哪有家」，佢一邊揸車一邊諗，「國家」呢個詞語可以俾人咁用法，咁佢係咪又可以話「沒有父，哪有子」，或者「沒有夫，哪有妻」，再唔係「沒有飯，哪有桶」都得！
傳真︰2623-9278
電郵︰