今年度的奧斯卡金像獎頒獎典禮（香港時間3月24日舉行）氣氛感覺特別濃厚，中環嘅CaliforniaRestaurant行政總廚Jason首度引入「傳統加州式」奧斯卡電影大餐，除咗所有食品用正參選電影劇名外，頒獎禮當日重有現場直播，兼有最佳男、女角競猜遊戲玩，今年唔使淨係睇直播咁悶啦！
記者：朱崇德
攝影：WING、伍慶泉、朱崇德
在美國加州──奧斯卡嘅主場，當地人嘅慶祝活動更加熱烈，差唔多會當係一個節日慶典咁慶祝。曾任職全美第一位酒店FourSeason的廚師及現任香港CaliforniaRestaurant行政總廚嘅JasonHyatt表示：「好多美國人，尤其係加州人，對奧斯卡頒獎禮好狂熱，差唔多會係特意攞假同大班朋友去睇，感覺就好似香港人睇世界盃，要去酒吧度同成大班人睇先有氣氛一樣！」
他續說：「至於一啲大餐廳，就會乘時推出一啲參選奧斯卡電影嘅戲名，甚至係明星人名，作為食物及酒品的名稱做招徠，而呢種奧斯卡大餐，慢慢就成為加州人嘅傳統！」
香港暫時都未見過有餐廳或酒店玩過呢樣咁地道美國風味餐食，Jason作為加州人嘅一分子，首度將奧斯卡菜引入香港（3月21-24日），除咗餐食全部用戲名之外，在24號奧斯卡頒獎當日，重會用多部Plasma大電視，作即場直播；此外，在奧斯卡頒獎前夕還有一個競猜最佳男、女主角遊戲，而一經估中兼被抽中，就可以免費獲贈價值約$300的CaliforniaRestaurant行政人員午餐一個，算係為呢次75屆奧斯卡加添一啲氣氛。
《魔戒二部曲：雙城奇謀》係Jason今年比較睇好嘅一套電影，相信在今年奧斯卡一定會有好收穫。基本上佢係由兩塊厚厚嘅美式傳統朱克力做成，靈感來自電影Poster嘅雙子塔，而用黑色朱古力做題材，就係為咗表達戲中索倫魔君以黑暗力量統治世界情景，真係相當貼題；Jason重話今次朱古力特別加重雙倍份量，所以入口時特別有質感，而且味道特別香濃，怕肥人士要切記小心！
當小記再睇真啲個名時，好似TwinTowers同原戲名有啲出入喎（原戲名為《TheLordofTheRings:TheTwoTowers》）！Jason話今次呢度菜式除咗係為咗奧斯卡電影頒獎禮外，其實當中重有一份為咗追悼9.11事件中，對世貿大廈雙子塔上死去生靈的懷念，當談及呢個問題時，平時笑面迎人嘅Jason，亦變得非常嚴肅起來……
把這份朱古力蛋糕形容為「超級」絕不為過，因為據Jason話比一般蛋糕落重了雙倍朱古力份量，所以超級香濃，纖體人士小心！
今次《EightMile》大餐，主要是用豬的特靚大肉排所製作，肉排當然唔會真係有8里咁長啦！不過都有番咁上下嘅8吋代替，再加上有成兩塊咁多，如果細食啲嘅女士們Order，我諗真係三個人都夠食！
燒汁方面用上傳統嘅BBQ燒汁，不過最重要係火路問題，唔乾身又香口，少少骨嘅香味連帶排骨位豬肉的嫩滑口感，真係少啲經驗都做唔到！不過小記最喜歡的，還是伴食的粗切連皮大薯條！點上BBQ汁加肉汁，簡直係全道菜精華所在！
用上8吋嘅肉排一啲都唔乾身，尤其係近骨嘅肉更嫩更滑，加埋BBQ汁簡直一絕，不過份量可以令三位女士齊聲叫飽！
《紐約風雲》𠵱家重喺香港戲院上映緊，聽講票房同口碑都相當唔錯，至於特別為該戲做的NewYorkPizza，並唔係一味特別的新菜式，佢以傳統的製作方法，但當中驚喜係鮮茄醬特別多，燒香以後特別惹味，至於餡餅做到外邊厚中間細薄，以猛火燒焗後，有類似餅乾的脆口感，做得非常正宗！
問到Jason點解用薄餅代表《紐約風雲》時，佢話其實有啲中國嘅隱喻情感在其中，好似中國人食湯圓，會有一家大細團圓嘅意思，至於美國菜中，當然無湯圓啦！不過外國嘅薄餅一樣圓，而且又可以一家大細一齊分享，意思都好相似啫！
用綠橄欖、大肉腸、芝士及大量新鮮番茄醬所做成，記者食過後覺得最特別原來是燒香後的茄醬香，加埋脆餅熱辣辣，正！
講真！呢套《TheQuietAmerican》，都係啱啱1月喺美國公映，離開美國老家嘅Jason都暫時未有幸睇過全套劇，所以對佢嘅印象只係從網上及朋友口中所憶述嘅零碎片段！由於係盲人摸象，所以Jason好直接地諗到話要玩食字，只要在戲名後面加個Burger（漢堡包）就搞掂！小記話佢好似行咗啲喎！佢答話最能代表美國人嘅食物，原來始終都係熱狗同漢堡包！
這個最能體驗美國地道食物–漢堡包雖然行咗啲，但塊扒同芝士都成吋厚，又真係正宗美式大件夾抵食喎！
CaliforniaRestaurant
地址：中環德己立街3032號加州大廈地下
電話：25211345
營業時間：星期一至四12:00nn-1:00am、星期五及公眾假期前夕12:00nn-4:00am、星期日6:00pm至深夜