因經紀K講「水盡鵝飛」與「水靜河飛」，左丁山寫咗兩篇，估唔到因此一日之內收到二十幾封讀者電郵，由學生以至博士都寫嚟，可見讀者興趣之高。
呢兩三日，左丁山都有上網找資料，搵到一啲料，而讀者送到嘅資料，亦大致雷同。謹此多謝各位。經二十幾位讀者提醒，配合網上資料，香港人口頭講咗幾十年嘅口頭禪「水靜河飛」，雖係約定俗成，實在係口頭傳播之誤。呢句話有下列出處：
（一）元代關漢卿《望江亭》雜劇第一折：「你休等得我恩斷意絕，眉南面北，恁時節『水盡鵝飛』。」
（二）元尚仲賢《柳毅傳書．楔子》：「我則為空負了雨雲期，卻離了滄波會，這一場抵多少『水盡鵝飛』。」
（三）《殺狗勸夫二折》：「可不道一部笙歌出了隨，抵多少『水盡鵝飛』。」
（四）《雲窗夢四折》：「我則道地北天南，錦營花陣，偎紅倚翠，今日個『水淨鵝飛』。」
（五）《雍熙樂府（四）點絳唇》：「怕不到瓜甜蜜就，少不得水淨鵝飛。」（以上詳見台灣名作家張曉風因訪問中文大學而寫嘅《河飛記》。）
以上幾種版本，相信已有足夠權威性，以後毋須再拗；呢句話係元朝雜劇語言，點解流傳到廣東話之中呢？大概冇人研究呢個問題，亦間接證明廣東話甚有古風，大有文化，絕非粗鄙。寫到呢度，收到《壹週刊》文稿編輯吳純忠嘅傳真，講「水盡鵝飛」出處，見諸佢本書《有的放矢》，多謝晒。