某位曾經好受上流男士歡迎嘅整容女星，因為呢排冇咗經理人撐，加上本身又大使，兼且做嘢冇心機，所以經濟有啲拮据。好彩整容女星近排接咗套戲，但馮仁昭聽聞整容女星早幾個月手緊時，唔掂到要重操故業──俾人包，佢重周圍同人講包自己一個月只需畀二十萬，以前整容女星每個月起碼都收過百萬啦，所以馮仁昭覺得佢咁樣都算割價大傾銷囉！
講番呢位整容女星，佢初初由外地嚟香港發展，因為身材好又風騷，曾一度上位，後嚟黐埋去一個自稱「叻叻」嘅生意人，可惜「叻叻」後來生意失敗，整容女星重俾佢拖累，聲勢大跌。
馮仁昭聽聞整容女星呢次割價行動，上流社會雖然覺得好超值，但畢竟整容女星都過咗氣，所以始終吼佢嘅人唔多。
江欣慈（前名江希文）𠵱家全情投入籌備新碟《囍》，預計會喺下個月出街，江欣慈為咗新碟搏晒老命，除自掏腰包投資近百萬出碟外，重自己寫埋歌，實行做個唱作人。碟內有首歌更成為《下一站…天后》嘅插曲，不過江欣慈就話最開心都係得到家姐江欣燕同姐夫吳積遜嘅支持，姐夫重借間酒吧畀佢拍MV㖭。
嚴淑明同梁詠琳前晚去中環蘭桂坊消遣，嚴淑明話同梁詠琳餞行，因為梁詠琳稍後會去美國深造紅酒課程。嚴淑明前晚右手中指戴住隻約三卡重鑽戒，非常搶眼，問係咪緋聞男友廖堯城送畀佢嘅？佢笑笑口話：「朋友送嘅，都戴咗一排，我近來冇同廖堯城約會，因為大家都係公眾人物，唔係咁方便。」
最近台灣有製作人搵咗蔡少芬做電視劇《龍神傳說》嘅女主角，重諗住搵吳奇隆做男主角，但有傳吳奇隆知道舊愛蔡少芬做女主角之後，就唔想接，怕佢𠵱家個內地女友馬婭舒呷醋。但呢套劇嘅製作人就幫吳奇隆解釋，話吳奇隆要籌備自己做製作人同主角嘅新戲，先至唔得閒接呢套劇，唔關蔡少芬事。
麥浚龍（Juno）噚日喺赤柱出席「同心同德助更生」活動，Juno重獲委任為「南區助更生之星」。Juno講番佢細個時返學成日犯錯，而佢最大缺點係大頭蝦，Juno話：「我返學成日都帶漏上堂嘅嘢，搞到班主任一聽到我個名都驚。」
