記者走進黃女士的家，觸目所及，陳設相當簡陋，室內只有寥寥幾件殘舊的家具，說是一間「吉屋」也一點不為過。
「我周身病痛，食都幾乎唔夠，重邊有多餘錢買嘢吖！」身穿棉衣，頭帶冷帽的黃女士，一臉病容地說。
五十三歲的黃女士，自十一年前被丈夫拋棄，情緒大受打擊後，病痛便接踵而來，她既患有精神病，亦有糖尿病、肺病及坐骨神經痛，苦不堪言。「每次去醫院，都要驗呢樣、驗個樣，每個月至少抽三、四次血，有時真係抽到手都震，好陰功。」
黃女士原育有兩名女兒，長女現年二十七歲，次女二十三歲，可惜兩人暫時都不在她身邊，令黃女士倍覺孤寂。「我兩個女讀書都好叻，大女上年考到獎學金，𠵱家去咗外國讀書；細女就喺香港讀緊商科，我自問冇能力供佢，所以暫時交咗畀啲親戚照顧。老實講，有時我都想佢地唔好再讀落去，出嚟做嘢照顧吓我，但諗深一層又唔想阻礙佢哋大好前途，惟有叫自己忍耐多幾年。」
黃女士現靠綜援金維生，由於經濟拮据，她連基本的家庭電器，例如：電視機、洗衣機、雪櫃等一直都沒能力購買，僅有的電飯煲也十分殘舊，恐有漏電之虞。「我冇電視睇成六、七年，洗衫就逐件逐件用手洗，冷飯菜汁咪用筲箕蓋住囉，冇錢有乜辦法。𠵱家我最擔心個電飯煲咁舊，唔捱得幾耐，漏電發生意外就死啦。」黃女士正期待善心人伸出援手，改善她的生活。 捐款編號：C0872
暖流熱線
電話:29908688
傳真:23702192
電郵:
網址：