美股上周四急升4%，為防急升後有回吐，上周五揸貨過假期嘅人亦唔敢揸得過重。不過，美股上周五回吐壓力唔大，杜指反覆上升37點，有利港股今日再抽高啲。上周六推介和黃Call輪9666及中信Call輪9646可以按原定計劃部署，但只宜快手快腳炒短線。
近期最先見底嘅大藍籌係中移動（941），上周二跌至15.30元已經跌唔落，率先展開反彈，上周五最高見過16.60元，收16.20元。睇走勢，中移動應該未升完，Call輪仍有短炒價值。
中移動Call輪9594，今年5月到期，行使價17.80元，溢價12.2%，槓桿率43.8倍，上周五收0.037元，係短炒線鍾意刺激者首選，但亦有一個問題，注意兩個月內正股會否升回18元之上，另外溢價12.2%，引伸波幅35，計落唔算平，亦係只適宜快手快腳炒一轉，如果唔好彩睇錯，止蝕莫遲疑。
如果唔想咁刺激，可以揀年期較長嘅中移動Call輪9574或9768，兩隻輪數據差唔多，同係9月尾到期，以引伸波幅計，9574平少少，但有人着重發行商過往維持秩序表現，所以9768略貴些少亦合理，其實睇番交投量，兩者亦係不相伯仲。
章盛