近幾年樓市急轉直下，好多人對物業前景冇晒方向，唔同嘅專業人士都有不同睇法，恒基就趁昨日星期日，喺將軍澳新都城二期商場搞講座，分別請來風水師李丞責，前線地產代理界代表施永青，以及嶺南大學教授何濼生演講。
今次特別請來李丞責從玄學角度分析，幾有新意。李大師話，香港唔同地區都有唔同嘅地運，當然行正地運嘅區域就比較旺，由於將軍澳填海工程未完，地運仍然會不斷變化。佢亦補充，買樓唔單止要配合地運，重要配合個人運勢。
施永青最拿手始終都係計數，所以佢嘅論點都離唔開樓價、供款等因素，佢覺得𠵱家供平過租，買樓都諗得過。至於作為學者嘅何濼生，就比較着重房屋政策，認為政府或可以回購居屋，等啲居屋客流入私樓市場，從而帶旺一、二手交投。
香港建築師學會由65年已經開始搞嘅建築年獎，啱啱公布02年度得獎名單，其中山頂種植道一號（圖二）獲得住宅建築項目嘅優異獎，評判團評語係，整體設計優質，建築物與地形融合和諧，大廈布局成功為住客提供環保又實用的居所，單位內部比例適中，建築選材富成本效益。所有因素結合成一個優美舒適嘅生活環境。
今次嘅參選作品多達八十二項，分四個主要組別，其中參選全年建築大獎及優異獎嘅就有四十八項。得獎作品會搞展覽會，即日起至二十號，地點係金鐘太古廣場。
一向事務繁忙嘅長實趙國雄，經常中港兩地走，今個禮拜三又要飛去福州，然後再去上海。但係佢對本港樓市動向仍十分關注，過去一個星期無間斷地翻炒樓市轉好言論，噚日重將成個禮拜嘅言論重炒一次，等行家們溫故知新。綜合而言就係市民入市信心恢復，孫九招效應浮現，帶動市場氣氛，係推盤好時機。既然咁好環境，長實賣樓步伐係咪會加快？佢只係話會有秩序推盤，部份樓盤甚至會加價！
至於新嘅論調，就係並不認同政府有意將空置居屋售予發展商，佢話𠵱家市場供應多，毋須急於將該批單位出賣，進一步打擊樓市。
今年樓市睇嚟都係麻麻，但仍有代理行計劃開分行，蘭西聽美聯營業董事羅國安講，佢哋擴充業務，唔係睇目前，而係放眼幾年後，好似西九龍同將軍澳咁，兩年後會有好多二手盤，相信到時會有唔錯嘅商機。
由於係新發展區，可以開舖嘅場唔多，要等新商場出租，羅國安就話一於慢慢等，重好大口氣話個個商場都有興趣。
澳洲發展商Australand，預留二十間悉尼嘅豪宅GlebeHarbour上周末發售，兩日就賣咗四成，共八間，有投資者亦有自住客。公司亞洲區市場經理黎國祥話，個盤早前喺澳洲已賣咗超過五成，約六十七個單位，每方呎三千四至三千五港元，買家都唔多唔少同香港有關，包括喺香港做事嘅澳洲人、澳洲回流返港人士、子女喺澳洲升學嘅香港父母等。
長實即將推出嘅東涌映灣園二期，同公益金合作搞「映灣園對對獎賞為公益」活動，善長以10元購買獎券，擦中一對映灣園的設施就有獎，包括信用卡簽帳額及超級市場禮券等。
另外，天水圍慧景軒繼早前舉辦熱氣球活動，為世界（香港）自然基金籌款後，昨日又請來「皆大歡喜」嘅演員薛家燕、陳彥行及鄧兆尊，到嘉湖銀座商場售樓處外義賣CD。
蘭西
電郵地址：
