小初上周末同經紀陳研究過，明日公布中期業績嘅華瀚生物科技（587），同埋公布全年業績嘅TCL國際（1070）有機會借業績短炒。
經紀陳好似特別鍾情華瀚，多番向小初推介。自從隻股在3月初有宗大手非自動對盤成交後，股價果然拾級而上，不過就升得較閃縮，似乎唔多夠氣勢。
經紀陳話，據聞華瀚有大陸炒家至今尚未出貨，加上華瀚呢類上市冇耐嘅半新股，所公布嘅業績通常唔會差，因此唔排除會借機會炒一炒。
另外，早排被外資行唱淡嘅TCL，因投資者擔憂中國市場手機供應過量，導致股價一度低見1.67元。由於即將公布嘅業績估計唔太差，有人趁低吸納，股價在上周五已升回1.90元。
近期外資分析員又話TCL股價已經超賣，冇理由咁殘，加上大部份分析員估計TCL2002年賺多過5億元，相信對短期股價有刺激，但長遠而言，手機毛利率下降始終係一個大隱憂。
慕容小初