今季表現神勇嘅紐卡素前鋒舒利亞，喺贏咗查爾頓嘅聯賽後就話考慮再次代表英格蘭國家隊，佢話：「如果我話唔掛住再為國家隊效力嘅日子係呃人嘅，我覺得有能力為英格蘭作出貢獻！」
對於舒利亞肯重出江湖為英格蘭比賽，我求大俠固然開心，但作為紐卡素球迷，又對佢嘅決定有啲擔心。舒利亞都三十有二，佢自己都承認近年可以保持咁弗，都係多得喺二○○○年歐洲國家盃之後退出咗國家隊，唔使為國家隊東征西討，可以集中精神為紐記效力之故，唔怪得紐記領隊卜比笠臣話：「如果舒利亞決定再次為英格蘭披甲，我唔會阻止佢，但我寧願佢唔復出！」
修咸頓喺上星期六場英超聯可以迫和富咸二比二，就真係多得門將尼美，因佢唔單止屢救險球，重喺比賽補時階段，接應角球助攻，喺富咸禁區內心口控定起腳，個波中柱角後，由隊友M史雲遜補中，令球隊搶得一分。賽後修咸頓領隊史特根都話：「呢一招並唔係我哋嘅死球練習之一，但估唔到好有效喎！」
南華同愉園噚日合演咗場緊張刺激嘅銀牌決賽，相信無論入場或者睇電視直播嘅球迷都應該滿意嘞；而南華捧走佢哋今季第一個盃，連埋晉級獎金，主力就有萬四蚊，而當中幾位港腳歐偉倫、丘建威同陳志康等喺東亞賽外圍賽又執萬幾，即係話呢個幾月額外多成三萬收入，認真「肥仔」，喺香港踢波踢得標青，都咪話搵唔到食！
收費台近排sell睇三月尾嘅歐洲國家盃有得揀，我哋收到有讀者投訴，話佢哋假民主，因已公布嘅節目安排，定咗播列支敦士登對英格蘭，同荷蘭對捷克；佢哋公關大員嘅解釋係可以隨時改，但我求驗客話，荷蘭對捷克播硬，大家唔使嘥嗰個半銀錢去投票，但唔係英格蘭躉，不如支持吓佢播有舒夫真高助陣嘅烏克蘭迎戰魯爾嘅西班牙囉！
小馬班主古賓絕對係NBA中最食腦嘅班主，佢搵錢同宣傳嘅伎倆層出不窮。最近佢又同漫畫公司合作，推出一系列嘅《小馬群英》漫畫，佢自己重做埋主角；故事當然唔少得小馬「鐵三角」：奴域斯基、芬尼同尼殊，佢哋三個扮演擁有神奇力量嘅超級英雄，同入侵達拉斯市嘅怪獸大戰連場。真係要向古老闆嘅創意寫個服字！