謝霆鋒復出後，前晚在《博愛》騷中首次公開演出，但卻咪嘴表演，同場的陳小春就暗寸開過演唱會的歌手不應咪嘴，而李克勤亦揚言自己只硬銷唱現場。昨日霆鋒對此說：「任何人講其他嘢我都唔會理。」
謝霆鋒復出後，前晚在清水灣電視城舉行的《博愛歡樂傳萬家》中首次公開表演，打頭陣出場的他演唱《玉蝴蝶》及新歌《第二世》。但霆鋒卻咪嘴演出，其過氣情敵陳小春以及李克勤，事後不禁揶揄一番，指做歌手的實在不應咪嘴。
小春前晚被問到他是否唱現場時，即含沙射影地說：「TVB唔可以咪嘴㗎，唱片公司畀壓力我，唔可以咪嘴，我當練歌囉。公司同我講過，話開過演唱會嘅唔可以再咪嘴㗎，公司話我唱live唱錯、記錯歌詞都要罰錢，我都有俾公司罰過。」但問他知否霆鋒咪嘴？小春則說：「吓？呢啲我唔知喎。」
前晚小春與霆鋒在電視城內，相差幾個身位但仍沒有合照，小春對此說：「合咪合囉，冇問題㗎。」而他亦表示與霆鋒有眼神交流，他說：「禮貌上都要嘅，我哋冇所謂。」未知小春曾否對霆鋒勉勵一番？他說：「講乜啫？咁大個仔，唔需要，佢醒啦，唔使人哋鼓勵，出得嚟就有預備，呢啲心照啦，HongKongStyle吖嘛。」
作為「博愛」愛心大使的克勤前晚被小春及霆鋒搶盡風頭，他表示不介意：「我唔使要呢啲，由佢搶囉。」問他是否唱現場，克勤即自信地說：「我哋呢啲唱live嘅，唔sell呢啲sell乜呀？」對於小春與克勤一番話，昨日霆鋒透過電話回應說：「我今次係出心做善事，任何人講其他嘢我都唔會理。」其經理人霍紋希也在電話中說：「場地環境許可嘅話，佢會盡量唱live，但今次佢重要同樂隊同埋煙花配合，所以係有部份唔咪，部份就有咪。」
採訪：胡比、王崇穎
攝影：何國豪、陳慧安
