傳向Boe媽道歉　再約飯局
楊恭如：佢係都要吹牛

楊恭如早前與上海富豪朱紹雲相約吃飯，有傳聞該飯局是Boe媽穿針引線，但昨日楊恭如澄清不認識對方，要與Boe媽劃清界線，但Boe媽聲言稍後會再約楊恭如與朱紹雲吃飯。

楊恭如早前在港島某酒店與七十多歲的上海富豪朱紹雲吃飯，飯局中還有經常介紹富豪給女藝人認識的Boe媽，事後楊恭如並不否認曾出席此飯局，但她強調不認識Boe媽，不過Boe媽卻向傳媒表示，她與楊恭如是朋友，又指楊恭如曾為此事致電向她道歉。而日前亦有報道指譚玉梅是Boe媽的密友，但譚玉梅大前日出席公開場合時向傳媒否認兩人關係，更因此掀起電話罵戰。

「點知嗰隻嘢喺度」
昨日楊恭如、王晶、文雋和秦海璐等在北京為合資的火鍋店主持剪綵儀式，楊恭如重申要與Boe媽劃清界線，她說：「我夠可以話認識米高積遜，但人哋唔識我，佢要咁講我冇辦法，我都唔知佢點解有我電話，上次嘅飯局喺公眾場所食，點知嗰隻嘢喺度啫！佢係都要吹牛，我都阻止唔到，但我可以強調同佢唔係朋友，希望傳媒唔好再將我哋拉埋一齊講，免得幫佢做宣傳。」
楊恭如續道：「我今次會喺北京逗留四個月，因為我要拍兩套劇，留喺度咁耐，到時我會請家人同朋友嚟玩。」記者追問楊恭如會否請周正毅來玩，她竟說：「我係亞洲小姐，梗係會請亞洲先生嚟玩，唔會請西人。」而文雋昨日則表示，舒淇與陳曉東因事未能出席開幕禮，他說：「早兩日王菲都嚟過呢度食嘢，今日佢同霆鋒都分別有送花籃嚟。」

「最終係我埋單」
對於楊恭如在上海接受傳媒訪問時，要與Boe媽劃清界線一事，記者昨日致電Boe媽，她說：「我唔相信楊恭如會咁樣講，佢一向好乖女，而且上次飯局事件後，楊恭如都有打電話同我講唔好意思，其實嗰次同埋朱紹雲食飯，最終係我埋單，唔信我有單據。」
問Boe媽可會安排楊恭如跟朱紹雲再食飯？Boe媽說：「我哋梗係會再約埋食飯，等楊恭如返嚟先。」
記者馮美茵北京直擊