每晚七點幾放工，到大馬路相熟報紙檔買馬經，見到有兩份《蘋果》剩響度，頭版鬼咁大幅相，就係阿松哥。多口問句檔主：「咁夜重賣唔去，《蘋果》滯銷咩？」檔主話：「非也，呢幾日攞多咗紙，好好賣。呢，呢幾張報紙皇氣重，去得好慢。」乜嘢叫做「皇氣重」？香港話，皇氣即係警察，唔通同曾一哥有關係？檔主話：「梗唔係！曾一哥新聞唔係去紙保證。皇氣重，即係保皇黨氣味重，𠵱家啲人客唔鍾意保皇，《蘋果》成日擺阿松上頭版，好好賣！」
哦，即係罵松先生有銷路，真係戥松哥傷心，中環滿地賓架，唔少人係松哥舊日老友，照計應該擁松，冇理由鍾意睇「殺牠死」報紙㗎？諗深一層，民意甚為不滿特區政府，碰啱阿松講錯嘢於前，爆出買車新聞於後，加上加稅不得人心，於是慘遭痛罵，代整個政府受罪。
特區政府形象好有問題，到底政府有何對策呢？董特首召集傳媒採訪阿頭聽佢講預算案，講「加息震盪論」，大編輯亦有出席。大編輯話一位電子傳媒阿頭問特首：「特區政府形象好唔掂，請問有何良策？」答案竟然係：「要睇你哋咯。」言下之意，莫非傳媒唱淡唱衰，專門報憂不報喜，先至係問題之根源？大編輯話：「特首好似仍然不知問題所在，你估我哋真係可以靠枝筆就令到市民擁護政府咩。」騎騎，如果係咁，權威愛國報就應該係最暢銷報紙啦，幾時輪到《蘋果》發圍！