日本天后濱崎步成日被人話佢好囂張，乜嘢都要贏，最近松隆子竟然斗膽踩場，喺步姐主持嘅節目《ayuready?》入面，用自己隻愛犬mushu同步姐隻狗maron鬥。點知mushu樣樣唔得，搞到松隆子好失威，而步姐就露出燦爛嘅勝利微笑，好鬼得戚。
其實我羅拉一開始就唔睇好松隆子隻mushu，因為步姐去影雜誌封面或者開幾萬人演唱會，maron都一定伴隨左右，所以當佢哋喺叫愛犬坐低抑或遞手兩個環節鬥法時，唔使講梗係睇高見慣大場嘅maron一線啦。maron真係醒目，主人步姐叫佢坐佢唔敢企，重好乖咁就遞上佢嘅玉手。
相反松隆子兩回合都輸，唔知笑定喊好，哀求mushu話：「手呀！畀隻手我！」但係mushu眼尾都唔望吓佢，係咁追住maron咬佢屁股，唔通佢輸咗條氣唔順要教訓maron？
但最落松隆子面嘅係步姐同maron講一句：「你走得啦！」maron就乖乖走去畀步姐經理人抱住，但係mushu就踩過松隆子助手隻手衝入觀眾席，激到松隆子手遮面苦笑！