寧餐餐食蛋　吞劍削髮　求雙雙隱退
梁詠琪反串伊健大爆兒女情

梁詠琪（GiGi）前晚個唱開鑼，她既露Bra大跳肚皮舞，又與女舞蹈員互攬摸胸，其男友鄭伊健雖未有出現，但她卻擺男友上枱，反串扮演伊健在電影《中華英雄》的華英雄造型，更揚言其心願是偕女友退隱江湖。

梁詠琪前晚假紅館舉行首場演唱會，她的母親及孖生弟弟均有到場打氣，其男友鄭伊健雖身在上海拍戲未能出席，但GiGi仍將伊健擺上枱，大爆二人拍拖的趣事。

舞台煙花失火
GiGi前晚共換了八套靚衫上陣，她既坐在摩天輪上唱歌，又露出迷彩bratop大跳肚皮舞，亦與女舞蹈員互攬摸胸跳辣身舞。其間舞台上放煙花，但卻不慎失火，燒焦了舞台的一角。
GiGi除了穿上性感歌衫外，更在預先錄影的電視片段中，分別扮菲律賓女傭、歌迷、肥妹及護衞員，其中最具瞄頭的就是她反串其男友鄭伊健在電影《中華英雄》中的華英雄造型，她在片中以華英雄口脗說：「我唔係命犯天煞孤星，係鍾意咗個歌星，佢一日三餐都係食蛋，詠琪唔識煮飯，淨係識煮蛋、烚蛋同燉蛋，肚餓冇嘢食就吞劍，詠琪又唔畀我剪頭髮，我惟有自己偷薄啲頭髮啦！」語畢她更扮吞劍及以劍削髮，非常搞笑。

鄭秀文發台瘟
GiGi這位冒牌華英雄續說：「我有個心願，希望能夠同詠琪退隱江湖，從此我喺屋頂日日練劍，佢就日日煮伊麵。」GiGi此話一出，即惹來全場掌聲雷動。
GiGi為製造熱鬧氣氛出盡法寶，但嘉賓鄭秀文（Sammi）及F4成員朱孝天亦不甘示弱，朱孝天與GiGi合唱《其實你心裏有沒有我》及《喜歡你》兩曲時拖手擁抱，表現親暱。而尾段出場的Sammi竟有少許發台瘟，上台時不但跣腳，還忘記部份歌詞，Sammi在台上說：「上年GiGi開演唱會，我送咗袋伊麵畀佢，今年就冇，所以我特登炸個伊麵頭送畀佢啦。」

發揮喜劇天份
對於反串扮華英雄，GiGi在演唱會後說：「係我同啲工作人員諗出嚟，我想發揮吓自己嘅喜劇天份，拍呢條片時因為伊健去咗上海拍戲，所以佢都冇睇過。」
採訪：王連連
攝影：陳志嵐