噚日北京選出中國國家主席、中央軍委主席等新領導班子，全部等額選舉，皆大歡喜；同人唔同命，英國牛津大學前日亦開始一連兩日校長選舉投票，十萬個牛津畢業生同教職員都有投票權，四、五個候選人爭崩頭，包括前港督彭定康。聽日公布結果，就會知道肥彭做唔做得成呢間歷史悠久大學嘅「最高領導人」。
八方噚日講過，肥彭嘅勁敵係德高望重嘅大法官賓厄姆勳爵，原本勝望甚濃，連英國嘅博彩公司投票前開出嘅盤口，都顯示大法官熱過肥彭。不過世事難料，香港大學要削經費，英國大學亦水緊，噚日去投票嘅五千位教職員同牛津舊生，唔少都覺得肥彭嘅國際人脈非常值錢，於是將「撲水」嘅厚望同手中選票，寄託喺肥彭身上，令佢喺第一日選舉中領先。
當然，其他候選人得票同肥彭相差不遠，呢次選舉又係採用充滿變數嘅單一可轉移票制，校長個位肥彭重未坐得穩。有選民唔鍾意肥彭嘅政客背景，更有位八十二歲嘅退休教授路易士話，香港回歸時肥彭向中方投晒降太遷就，所以唔會投佢票。睇怕呢位中方口中嘅「千古罪人」，要搵魯平同周南同佢申冤至得。
傳真︰2623-9278
電郵︰