以前一到假期，好多父母就會發揮其廿四孝本色，一早便叫醒仔女一齊享吓天倫樂，一家大細去飲茶歎番一盅兩件。但係𠵱家快餐店林立，好多小朋友都對傳統的蝦餃、燒賣失去興趣，所以一家大細飲早茶呢種咁有情趣的家族聯誼活動亦慢慢受到考驗。原來有唔少酒樓都有對策應付，好似近年興起的公仔造型點心就是他們的其中一道板斧。
金龍船集團91年開始做飲食，近年積極開餅店，分店接近40間而愈來愈多人認識，畀人的印象十分進取，原來近年愈來愈流行的公仔造型點心，亦係由他們帶起這個潮流。
聽旺角分店的經理溫先生說：「2001年左右，我哋嘅酒樓業務已經發展到一定嘅規模，但漸漸發覺喺傳統點心嘅銷售上開始無乜突破，我哋為咗爭取一啲年輕客人，同快餐店競爭，於是決定為點心來一個『變身』，推出一些外形較為得意嘅點心，藉此提高年輕人對飲茶嘅興趣，果然星期六、日同假日嚟飲茶嘅客人真係有所增長，多咗好多父母放假嘅時候帶埋仔女嚟幫襯。呢個做法有啲成績之後，公仔點心就喺好多集團式高檔酒樓開始興起。」
我冇牙食公仔點心
吳太太：「每朝我同我先生都嚟飲茶㗎，鍾意食呢度啲菜苗餃、牛肉球、腸粉等等，好少食公仔點心，因為好多都係炸，比較硬，我哋冇牙食，但假期同啲孫嚟飲茶，佢哋好多時都會叫。」
店名：金龍船海鮮酒家（旺角分店）
地址：旺角亞皆老街113號地下
電話：27118162
營業時間：周1-日8:00am-12:00mn
映月樓位於尖沙嘴遊客集中地，這些公仔點心是日本人至愛，一有旅行團到來，這些點心就會成為他們爭相拍照的對象，就好似當年中國第一次送熊貓畀日本，個個爭住睇熊貓一樣。不過當小記訪問一些茶客時，原來有好多都不知道這裏有公仔點心供應。原來是涉及製作上的問題，做一客公仔點心，雖然絕對難不倒一班全部做點心都超過十年的師傅，但就比較花時間，所以每日只有限量供應，售完即止。
當日就聽到一位做了三十年點心的胡師傅講：「做公仔點心的準備工夫基本上同傳統點心一樣，但係最麻煩就係要搞造型，要做得神似，係要花一點心機。」最後師傅反問小記：「知唔知點解叫『點心』？小記一向識食唔識做」，只有搖頭，師傅的答案是：「點心點心，就係用點點心機，一點一點去做嘅意思。」下次去飲茶，真係要用心留意這份「點點心機」。
未試過喎
蕭伯伯：「間中都會嚟飲茶，鍾意食呢度啲傳統點心，好似牛肉球、蝦餃、燒賣、炸雲吞、魚滑等，公仔點心？未試過喎。」
一定要試
盧先生：「因為每星期都會嚟尖沙嘴，所以經常都會喺度飲茶，點心質素十分好，但就唔知原來有咁多公仔點心，下次一定會同囡囡試吓。」
店名：映月樓
地址：尖沙嘴香港文化中心餐廳大樓一樓
電話：27220932
營業時間：
周1-511:00am-11:30pm
周6、日及假日9:00am-11:30pm
鴻星喺小記印象中，除了那條「樣衰」的石頭魚之外，點心亦有一定的水準，而親戚的小家族成員，亦好喜歡這裏的公仔點心，原來這些點心都是一班師傅經驗的集大成。
現時酒樓的生意競爭大，為保持點心的新鮮感吸引客人，每間酒樓都絞盡腦汁求變，鴻星亦唔例外，他們每三個月就會轉點心一次，一班師傅就會各自提出自己的建議，然後從中選出最好最有創意的，才會印在「點心紙」上，供應給客人。
店名：鴻星海鮮酒家
地址：灣仔港灣道8號瑞安中心1樓
電話：28028182
營業時間：
周1-610:30am-12:00mn
周日及假期09:30am-12:00mn