熱刺領隊荷杜近日對老將舒寧咸講，會方同唔同老舒續約，好視乎隊波來季踢唔踢到歐洲賽。老舒一早就表態話有心留隊，睇佢嚟緊一定搏晒老命幫隊波攞個歐洲賽資格，呢份動力應該唔講得笑。
大家都知荷杜為咗強化對波，呢一兩年使咗唔少錢，最慘係大圍經濟環境唔好，會方被迫縮皮。老舒就快三十七歲，袋兩萬幾鎊（成三十萬港紙）周薪，又難怪荷杜同佢先小人後君子。
講時講，老舒已經好幸福，因為唔係個個熱刺球員都有機會知道自己處境，好似後衞戴卓爾就埋怨荷杜無同佢溝通。想唔想聽荷杜點回應？佢就堅持自己嗰套無問題，話兩個月前同戴卓爾傾過，彼此知對方想要啲咩喎。吓，冇聽錯啩，兩個月前喎，荷杜咪以為個個都識同佢神交至得㗎？
英超麻煩球員真係唔少，好似紐卡素前鋒比拿美射術拚勁咩都好，衰就衰在場內紀律差。佢呢個月初對米杜士堡時就因為不滿裁判執法，出言不遜，近日俾英足總判行為不檢，少不免又要坐波監。如果佢品行好啲唔係成日坐波監，紐記成績一定比𠲖家好。
用「衰到貼地」四個字嚟形容今季嘅列斯就最貼切，據報話佢哋中場施夫莊臣膝頭好有可能要開刀，令佢提早收咧。列斯財困星散、上個禮拜連唯一錦標希望足總盃都落空、響聯賽重未擺脫降班危機，𠵱家再少多件主力。領隊雲拿保斯真係心血少啲都唔掂囉。
利物浦前鋒迪奧夫向些路迪球迷「放飛劍」，畀會方罰咗六萬鎊，不過領隊侯利亞就撐佢，重以當年向球迷起飛腳嘅曼聯球星簡東拿為例，相信迪奧夫有能力成為「利物浦嘅簡東拿」。大佬呀，人哋簡東拿當年起飛腳前已經幫曼聯建立唔少功績，迪奧夫邊有得比喎。
如無意外，葡萄牙國家隊教頭史高拉利好有可能會重用由巴西歸化葡萄牙嘅迪哥。費高就為呢件事好勞氣，狠批史高拉利咁做就會扼殺萄國年輕球員代表國家隊嘅機會。不嬲講究球員紀律同個人權威嘅史高拉利，當然唔會示弱，佢回應話：「點用人係教練嘅事，球員無權過問！」將帥不和，佢兩個遲早都大炒一鑊……。
前巴塞隆拿副會長卡斯迪斯日前爆料，話隊波雖然無好似傳聞所講負債近一億三千萬鎊，但欠銀行同埋其他球會條數加埋加埋都有六千四百萬鎊，所以季尾唔賣球員都唔得。我就睇死好似古華特為首嘅荷蘭兵會率先被賣走套現，你估呢？