梁錦松偷步買車事件，呢幾日讓路畀「肺炎恐慌」單新聞，但噚日忽然重新成為焦點。
有人估計係因為件事愈鬧愈大，經高人教路，阿松終於知死，拿拿臨趕喺聽日上立法會政制事務委員會前，自動引爆，做番場「請辭」好戲以挽回民心，又可以塞住班議員把口。
阿松噚晚讀聲明個樣欲哭無淚，不過今次件事其實未必擺得平，皆因前排唔少「車行職員」打去電台，大爆對阿松不利嘅「口供」，今次阿董同阿松嘅聲明仍然未向公眾澄清呢啲疑點，議員會唔會咁易放過佢？
前綫何秀蘭早幾日已經當面建議阿松「自動獻身」，主動叫特首成立專責小組調查自己，阿松聽完不置可否，唔知「請辭」嘅靈感係咪由此而來？
傳真︰2623-9278
電郵︰