上個禮拜個市重係靜得好緊要，即使好似上周五咁反彈近170點，但成交額只係得嗰50零億，反映唔到個市有轉勢迹象。不過聽啲行家講，雖然個市冇乜新錢，但仍然有唔少海外基金捧住一箱箱銀票越洋過海，嚟香港搵投資機會。呢一班基金同一般基金嘅性質好唔同，佢哋唔係好理會所買嘅貨有幾多上升空間，只會問隻股嘅下跌空間有幾大。
伏勝聽後覺得好奇怪，無理由啲基金經理會咁笨，無上升空間嘅股票都肯買，喺打聽後先知有因由。原來班基金來自花旗，由於美國佬極有可能同伊拉克打仗，班基金驚價波及無辜，就漏夜喺花旗市調咗筆錢嚟東南亞，擺喺香港嘅錢佔唔少。
由於呢批錢銀碼唔少，但只係為咗暫時避難，所以佢哋嘅目標只係保本就算，唔升都冇乜所謂。聽講佢哋已經喺市場上搵緊目標，其中一隻聽聞係早前炒到上8毫後跌番落6毫嘅彩星集團（635），為咗個基金，聞說班大戶會施展渾身解數，將隻股再炒番上8毫，不過有幾真就真係唔知喇。
話咗要打出新天地嘅意科控股（943）終於喺上個禮拜搞掂咗單合作，有得同廣大股民交代，估唔到佢哋咁有把炮，可以拉埋深業物流同CrownWorldwideGroup合作，喺深圳大搞物流業務。聽講今次佢哋三方合作，係國內首個有外資直接投資嘅物流項目，而且重得到本地及國內相關政府單位嘅祝福，照佢哋𠵱家嘅發展嚟睇，相信前景非常樂觀。有市場朋友話大陸物流市場非常大，加埋滲透率極低，唔怕冇生意做，所以不妨喺低位買番啲嚟坐吓，應該會有唔錯嘅回報。
伏勝