無綫姐仔陳穎妍昨日凌晨駕駛其寶馬途經銅鑼灣區時，被一輛白色Audi撞到尾部。據陳穎妍表示，雖然Audi司機有錯在先，但對方仍惡人先告狀，除了找來幾位朋友圍着她理論，更凶神惡煞，仿似要動手打她，令她害怕不已，惟有即時致電父親求救。
陳穎妍前晚出席在灣仔會展舉行的《鐵案懸謎》慈善首映禮後，獨自駕駛其寶馬座駕離去，豈料在凌晨一時半左右，記者在銅鑼灣柏寧酒店對出路面發現伊人芳蹤，當時其寶馬被尾隨的白色Adui撞花尾部，陳父則與五名男女理論，一直靠在父親身旁的陳穎妍，表現得十分害怕，神色慌張。
五男女見記者即遁
當記者上前了解時，跟陳穎妍理論的五名男女即時鳥獸散，而陳穎妍見狀便向記者求助說：「我好驚呀！佢哋撞到我部車後，搵咗一班人落嚟圍住我講數，佢哋飲咗酒，好惡，想打我恐嚇我咁。正話我只係得一個人，又驚又唔知點算好，咪打電話叫爹哋過嚟囉！究竟我報警好定係自己搵人整部車就算？我部車重好新㖭㗎，𠵱家就整花咗後面！」陳穎妍說時眼濕濕，可見她確是擔驚受怕。
「賠三千唔夠整車」
就在陳穎妍跟記者交代事情經過時，跟陳穎妍理論的其中一名男子折返現場跟陳父傾談，沒多久，駕駛白色Audi的男司機及其女伴亦折返現場將Audi駛走，然後陳父便着陳穎妍開車離去。
記者昨日再致電陳穎妍，原來對方已賠償了三千元給她，但據她估計，三千元根本不足支付她座駕的修理費用。陳穎妍說：「噚晚我揸車時啱啱遇正紅燈，前面部的士停落嚟，咁我咪跟住停囉。點知後面部Audi停唔切撞埋我部車嘅尾度，嗰個男仔即刻走上嚟問我有冇事，然後又叫我將部車泊埋一邊，唔好阻住後面啲車。初時個男仔重好有禮貌，但唔知佢係咪飲咗酒，講講吓竟然變得好無理，話係我唔啱在先，話我唔應該突然停低部車，跟住又call埋佢班朋友落嚟圍住我。」
「以為我同爹哋好蝦」
陳穎妍表示，由於當時有五男女圍着她，自己求助無門，所以打電話向父親求救。陳穎妍又說：「對方好大聲咁問我要賠幾多錢，話一定賠畀我，前前後後講咗七、八次，但佢一味得個講字，完全冇話賠幾多，而且佢個樣好惡，好似想打人咁，好在佢啲朋友㩒住佢咋。後尾佢個男性朋友走去㩒咗三千蚊畀我爹哋，當係賠償畀我整番部車，件事搞到成三點幾先至搞掂。」
心愛寶馬被撞固然心痛，但最令陳穎妍氣憤的，是明明對方有錯在先，卻惡人先告狀，她說：「大家可以平心靜氣講番件事，我都唔明點解佢做錯事都要咁勞氣，初時佢哋見我同爹哋個樣好似好好蝦咁，咪恃住人多蝦人少囉，後尾好在你哋啲記者嚟到，佢哋見咁多人先至唔敢咁惡咋！」
此外，陳穎妍前晚獨自出席《鐵》片首映時，被問到有雜誌拍下她與永安旅遊前副主席陳若磐拍拖，並跟恒基地產主席李兆基之子李家誠及其女友Deon，一起行街食飯的照片，陳穎妍承認現時確是跟陳若磐交往，但與李家誠及Deon卻並非時常見面。
採訪、攝影：娛樂突發組、馮美茵
