最近有報道話郭羨妮翻𠝹無綫靚仔小生陳豪，前日佢哋一齊出席無綫新劇《鳳舞香羅》記者會時，自然成為傳媒追訪目標。
咁啱呢頭陳豪同郭羨妮俾記者拉埋影相，重幫郭羨妮講好說話，叫記者放郭羨妮一馬。嗰頭陳豪嘅緋聞女友陳慧珊就同林保怡、導演趙崇基，前晚一齊去跑馬地嘅Floor飲嘢，傾到凌晨一點先走。
陳慧珊見到成班記者，嚇咗一跳，佢話：「嘩！出面冇新聞咩？」然後就同林保怡各自揸車走人。
陳慧珊臨走前重講笑，話叫埋林保怡上佢部車俾記者影相，等大家有話題，咁即係話同林保怡搞緋聞啫！唔知佢係咪想向緋聞男友陳豪施下馬威呢？
不過據馮仁昭所知，陳豪同陳慧珊感情好穩定，郭羨妮就算真係想叉隻腳落去，真係一啲都唔易。不過正所謂近水樓台，陳豪同郭羨妮一齊開工日日見面，做女朋友嘅唔擔心就假嘅，惟有跟住落嚟嘅日子，自己執生睇緊啲啦！
早前有報道指模特兒黃榕係英皇二人男子組合Boy'Z成員Steven嘅前女友，黃榕前晚喺銅鑼灣出席《魔宅之鐵鎚凶靈》試映會，佢話：「懷疑件事係有人想中傷我，我同Steven係朋友介紹而認識，我覺得佢好靚仔，但佢公司（指英皇）管得好嚴，唔畀拍拖，佢咁靚仔都冇安全感啦。」
陳松伶噚日出席沙田一個環保活動，佢話稍後會去醫院探訪肺炎病人，問佢會唔會學特首董建華過門而不入病房？松松話：「儍啦！一定會入，咁先可以關心到病人，其實我呢啲蟻民，死十個當五雙。阿董要頂住香港嘛！」松松又自薦做財爺梁錦松嘅繙譯，因為阿松成日都講錯意思喎！
曾主演電影《霹靂火》嘅藝人胡凱欣噚日喺台灣正式下嫁余國禎，佢哋重依照傳統儀式設宴款客。胡凱欣嘅媽媽上個禮拜專登飛去台灣幫佢打點一切，結婚前一晚成班姊妹團重專登為佢搞咗個單身派對，希望佢好好狂歡一晚。
趙頌茹（阿Yu）噚日去銅鑼灣接受電台訪問，提到余文樂嘅露毛照，阿Yu尷尬咁話冇睇過，重話自己嘅極限係着比堅尼，同唔會為着低腰褲而剃毛，阿Yu話：「係拉低條褲先會見到啫！」再問阿Yu早排張栢芝着低腰褲都試過露毛喎？佢話：「吓？佢個人鍾意啩，每個人有唔同風格，佢fashion啲，我保守啲。」
