課程沉悶、讀書考試壓力大、性教育不足、教育改革朝令夕改……中學生對自己上堂學嘅內容，完全冇話事權。噚日有班兒童議員喺立法會內，向政府表達不滿，要求大人問吓啲細路，到底佢哋想學乜嘢。
六十位中學生噚日參加「聯合國兒童權利公約──兒童大使計劃」嘅兒童議會，其中十位來自拔萃女書院同沙田官中嘅中二至中六學生，用五個月時間寫出一份完整嘅建議書，提出成立「課程發展兒童諮詢委員會」，經過議會一番激辯，有過半數兒童議員支持議案。
佢哋開口埋口「多謝主席」，起身坐低不忘鞠躬點頭，禮儀不比真正議員遜色。八方更加驚奇嘅係，根據佢哋做嘅三千幾份問卷，原來唔止兩成學生唔知教育署已經併入教統局，亦有唔少老師唔清楚政府邊個部門負責課程發展。
（圖）六十位兒童議員坐喺立法會會議室，討論質詢有關兒童嘅議案，有板有眼。
黃賢創攝
傳真︰2623-9278
電郵︰