新版日產Cube已推出一段時間，但代理方面一直未有消息話會引入，就連一眾獨立車行運抵香港發售嘅，都只係標準版型號，或未能迎合部份用家口味；不過，最近坊間某大獨立車行，卻率先引入加裝有全車原廠包圍嘅CubeRider版本抵港。新車不單止賣相變得頗有小跑車風采，而且重倍添有一份吸引力㖭！加上一台慳油好力嘅1.4公升引擎，睇落又真係幾有瞄頭喎！
記者、攝影：郭信強
今回率先抵港嘅日產CubeRider，全車加裝有由Autech提供嘅全車包圍，當中包括有一體式車頭泵把連整流器、車身兩側裙腳、車尾定翼，同埋車尾泵把連整流器，再襯以四輪15吋電鍍跑車合金胎軨，一派跑車形象完全表露無遺；另外，就連車頭鬼面罩亦裝上電鍍欄柵，望落真係好吸引㗎！
至於車廂方面，呢部CubeRider座椅以雙色作配襯，夠晒突出吸引之餘，由於用上軚自動波嘅關係，故此前排可有左右Walk-through嘅方便，而後排椅背更可作前後調校，配合上闊落車廂空間，乘坐倍覺貼服舒適；當遇有需要時，後排座椅更可以收摺起，以增加尾廂載物容量呢！設備亦見一應俱全，中控台除預留有音響座外，另外重有原廠冷氣，當然唔少得重有車內多個雜物匣配搭，除方便你擺放雜物外，亦正好切合RV實用性強嘅一面呢！
然而，新車則與其他Cube一樣，仍以一台編號為CR14DE嘅1.4公升直4DOHC引擎作動力核心，動力輸出充裕之餘兼且重有低耗油量嘅特性（平均耗油量為17.2km/L），對現今油價高企嘅環境嚟講，用作代步可謂適合不過；而匹配上一套4前速自動波，亦能令車子有敏捷嘅起步加速反應。由前輪麥花臣支柱及後輪扭力連桿所組成嘅懸掛系統，輔以剛勁有度嘅車架及15吋輪胎組合，亦能增添有一份路面循迹性呢！
新版日產Cube造型獨特富吸引力，而呢部加裝有全車包圍嘅Rider版本，就更能凸顯其年輕活力形象；車廂空間闊落唔在講，設備配搭又見齊全易用。而一台1.4公升引擎動力輸出充裕，匹配一套4前速自動波，用作日常代步絕對適合不過。
引擎：1386cc直4DOHC
馬力：98ps/5600rpm
扭力：14.0kgm/3200rpm
傳動：4前速自動波，前輪驅動
懸掛：（前）柱式獨立（後）扭力連桿
制動：（前）透氣碟（後）鼓式（ABS）
輪胎：175/60R15
尺碼：3730×1670×1640mm
軸距：2430mm；車重：1080kg
平均耗油：17.2km/L
新車售價：$168,000
車輛提供：AT1000.com（25252109）