當市場出現單邊市，大部份投資者睇法都側埋一邊，就係大戶出擊挾倉嘅時候。趙飛雲噚日去到證券行，經紀老友劈頭第一句就話，淡友終於有咁耐風流有咁耐折墮。
趙飛雲唔係咁睇法，除非伊拉克真係不戰而降，否則做淡友始終好過做好友。其實目前股市嘅情況，有啲似當年泰臣對道格拉斯初嘗敗績嘅情況，泰臣（好友）第一個回合俾道格拉斯打窒條氣後，一直處於劣勢，雖然第9個回合撞彩打跌對手，但最終都係被技術性擊倒。
杜指周四晚大升269點，收7821。雖然重上20日線7809之上收市，但短期降軌阻力在7880，更大阻力在頭肩頂頸線8130水平，升破才有轉勢希望。
恒指噚日跟隨歐美股市反彈，大升168點，收8956。恒指全周微升49點，扭轉連跌3周劣勢。但無論周線圖或日線圖，技術形態上暫未有任何突破，淡勢未改。
港股升近橫行區底部阻力9029已受壓回頭，若非噚日是星期五，唔想揸輪過周末，趙飛雲已按計劃，買入恒指Put輪9587，希望恒指下周一先高後低，有再上車機會。
意科（943）復牌撞啱全球股市大反彈，要造好可算事半功倍，股價裂口高開0.265元後不肯回頭，在0.27至0.275元窄幅橫行。趙飛雲在0.27元買入30萬股，短炒止蝕位上移至0.25元，初步目標仍是0.30元。
趙飛雲