小初周二先至講過，市傳有位揸住唔少江山控股（295）嘅炒家，因為水緊被Call孖展，連累江山近期股價腳軟軟。
點知話口未完，江山噚日上演笨豬跳，股價由0.10元插落去最低0.039元，收市雖然爬返上去0.047元，但計落都跌53%，跌幅相當得人驚。
經紀陳話，雖然江山股價跌得咁重，但大股東就一定冇事，亦唔會出現股權變動。不過，咁樣亦唔代表可以博反彈，淨係睇成交咁細，就知道人哋未沽完。
江山噚日雖然成交股數高達4276萬股，但成交金額只得209萬元，所以經紀陳嘅講法，亦不嘗冇道理。
經紀陳解釋，江山呢幾年進行收購，好多時都係印公仔紙支付，加上舊年又批過股，所以街貨數量其實唔少，現時股價出現笨豬跳，唔排除會嚇親其他人，跟風一齊出貨，所以勸告小初咪手痕。
慕容小初