郭羨妮入行至今緋聞不絕，先後跟不少男藝員傳緋聞，日前有周刊指她以短訊翻𠝹陳豪，昨日二人在將軍澳電視城，出席無綫新劇《鳳舞香羅》造型記者會，緋聞男女碰面毫不避忌，更大方合照。
陳豪、郭羨妮、黎姿和江華等昨日在將軍澳電視城，出席無綫新劇《鳳舞香羅》記者會。緋聞多多的郭羨妮自從和溫兆倫拍拖後，緋聞似暫告一段落，不過，日前有報道指溫兆倫欠債，郭羨妮為免被拖累而提出分手。
報道更指郭羨妮翻𠝹陳豪，頻頻以手機短訊冧對方，昨日二人出席《鳳》劇記者會時，表現大方。陳豪對於再次被傳媒拖落水，與郭羨妮扯上關係，表現得甚有風度，而且相當維護女方，陳豪說：「都唔係第一次傳啦，我就冇所謂，但係女仔就慘啲。大家放佢一馬啦，今次再同佢合作都唔驚得咁多，況且我行得正企得正。」
另一邊廂的郭羨妮則似是有備而戰，她否認與溫兆倫分手，她說：「咁又點呀，我同陳豪只係拍檔，最緊要係自己知道自己做緊乜。我同男友現時只係各有各忙工作，我哋嘅關係點樣，只有我哋兩個先知，總之冇變過就得。」
《鳳》劇另一男主角江華則表示不怕與郭羨妮合作會傳緋聞，他說：「佢惹緋聞都要有人受先得㗎，我自己工作就工作，唔會理其他嘢。」
而黎姿今次在劇中會與陳豪有一段情，她聽聞陳豪的緋聞後，即置身事外地說：「有郭羨妮頂住就得啦，唔關我事。可能佢哋兩個都好人，所以容易傳出緋聞，我同陳豪合作時惟有對佢硬朗啲啦。」
採訪：卓寶花
攝影：甄朝健
