佐丹奴上周公布業績，除咗慣常嘅四仙半末期息，重派特別股息一毫子，比去年多一倍。八方噚日見到佐丹奴前財務總監、現已過檔幫陳啟宗嘅恒隆地產執行董事吳士元Terry，問佢嗰份股息係咪好和味，佢笑笑口話叫八方自己計。
根據資料，Terry有六十九萬二千股佐丹奴股票，同埋九十萬股購股權證。但購股權證行使價係四個四毫六，𠵱家佐丹奴股價得兩個幾，佢應該冇行使；以六十九萬二千股計算，今次收息約十萬蚊。
講開恒隆，佢哋喺九龍站嘅新盤君臨天下，預計第四季推出，Terry出晒口術話，自己都會買番層自住，揀定三十八樓，記者立即起哄，話要去參觀佢間新居，叫佢一於搵自己間屋做示範單位，Terry雖然起初面有難色，但亦無托手踭，話等大家睇夠、影夠相先攞番嚟住，陳啟宗請到呢個夥計都算係咁。
（圖）恒隆地產執行董事吳士元。
傳真︰2623-9278
電郵︰