陳淑蘭與工程師男友William分手後，現時只有五隻愛犬在家中相伴。William跟蘭子分手前，曾送她一隻約瑟爹利犬「發仔」，蘭子表示，當她寂寞時會抱着「發仔」彈琴，打發孤單時間。
陳淑蘭早前與男友William分手，而William亦已遷出蘭子位於大坑的寓所，但兩人一直維持朋友關係。近日蘭子為了方便帶愛犬散步，特別物色新居，並準備擇日搬屋，重新開始單身生活。
蘭子愛狗如命，她現在與五隻狗一同居住，分別是兩隻與舊愛方中信一同飼養過的西摩犬、一隻松鼠狗、一隻約瑟爹利犬和一隻金毛尋回犬，其中金毛尋回犬「金豬」曾借給梁詠琪做宣傳。蘭子表示她的狗很頑皮，她說：「有次我帶西摩犬『福頭』入廠拍嘢，『福頭』見到鄧梓峰瞓覺，竟然擒喺佢身上做出不文動作，搞到我好唔好意思，鄧梓峰重話我啲狗冇家教！」
蘭子與William分手前，曾一同度過三十三歲生日，當時William得悉蘭子很想飼養一隻新狗，於是他就送了一頭約瑟爹利犬給蘭子做生日禮物，兩人並將小狗改名為「發仔」。蘭子對「發仔」愛護有加，現時感情生活一片空白的她說：「有時冇嘢做就拖啲狗去散步，或者捉住佢哋陪我彈琴，解吓悶都好。」
近日蘭子忙於搬屋事宜，她說：「有人話我因為俾港台cut咗幾日主持，賺少咗錢要搵間平屋搬，不過其實我呢次有計劃搬屋，主要係為咗屋企五隻狗，尤其兩隻西摩犬，佢哋都好老，𠵱家屋企要行樓梯，對老狗嚟講會好辛苦，所以我會搬間有電梯嘅新屋。」
採訪、攝影：比華利
