前日些路迪對利物浦場歐洲足協盃八強首回合，呢場和波都算好睇，尤其是上半場，不過唯一美中不足嘅，就係利物浦前鋒迪奧夫向些路迪球迷吐口水，認真冇品。
其實，今屆以一千萬鎊（約一億二千萬港元）加盟利物浦嘅迪奧夫，都算係今屆最過譽嘅新球員之一，呢位塞內加爾國腳喺聯賽𠵱家先入得三球，但就麻煩多多，俾人話插水、同隊友爭射十二碼乜都齊。佢之前喺作客韋斯咸時，已俾韋斯咸球迷話佢吐口水，但就冇證據；不過，今次佢就「人贓並獲」，俾電視拍到佢向球迷吐口水，就算佢事後道歉咗，但睇嚟應該走唔甩俾歐洲足協懲罰。
唉！高價買入咗個咁麻煩又冇效率嘅球員，唔知會唔會激到心臟原本已經唔多好嘅利物浦領隊侯利亞更加心血少呢？
英國著名嘅卓定咸節啱啱喺十一至十三號舉行完，係人都知英國球星大多鍾意賽馬，喺呢個咁重要嘅賽馬節日（包括卓定咸金盃在內嘅多項跳欄賽事），唔少球圈中人好似科拿同舒利亞都有去捧場。我求大俠就希望佢哋睇馬時睇馬，千祈唔好搞到比賽時心散就好喇！
德甲「莫財」球會凱沙羅頓，入咗德國盃決賽後宣布補發十一個月以來嘅欠薪；聽到呢單料，我求大俠又喜又憂，喜嘅當然係替班球員開心，但憂嘅就係啲缺水球會好多時知道球會有番啲錢之後，表現會走樣，拉素就係最佳例子，望凱沙羅頓今戰科特布斯時醒定啦！
新特蘭喺今日主場對保頓如果輸埋，睇嚟可以為來季喺甲組爭升班嘅事宜組軍。佢哋個新領隊麥卡菲唔知係唔係對護級信心唔大，就話會喺賽前先落球場同球迷見面，大打親民牌。計我求大俠話齋，球迷最想睇嘅，應該係班波來季重能夠喺超聯競逐，護好級先啦！
離NBA季後賽愈近，亦即代表喺想趕季後賽尾班車嘅球隊搏殺嘅最後機會，所以呢排各位球迷最緊要昅實喺中下游嗰幾隊，因為佢哋為咗爭入季後賽𠵱家幾乎每場都會搏晒命打，所以隨時會爆大冷。好似噚日西岸第九同十一位嘅太陽同超音速，分別爆冷打抵同岸榜首嘅帝王同小馬，睇嚟呢排強隊作客多讓都係小心為上。
梳打埠終於都對「假球」傳聞不絕嘅甲A出手，好多人覺得風險大。我求大俠就睇到佢哋其中兩個減低風險「秘技」，首先係只提供一賠一、可對沖嘅亞洲盤，而標準盤、波膽等就冇得玩！其次就係將亞洲盤再抽多半成水，有關莊家的確穩陣！
逢周六、日見報