哪個女孩子不喜歡發夢？世道艱難，平時營營役役，惟有在電影裏尋夢，年前的《嫁個有錢人》，道盡每個女孩子的心聲，希望有朝一日龍穿鳳，而唔係褲穿窿，SHOPPING唔使睇銀碼，瞓醒食HIGHTEA。今個星期，剛上映的《下一站……天后》和《五星級戀人》畀機會一眾姊妹在戲院裏發夢，有緣遇到一個幸運之神，終有一日有機會飛上枝頭變鳳凰。
記者：邵超
攝影：陳盛臣
現今樂壇新人輩出，若有人能記住所有新人的名字，在本人心目中確實比記住《寵物小精靈》的所有角色更加厲害。本周各位又要記多一個新名字，她的名字叫金大喜。
新生代個個發明星夢，由阿SA飾演的蜑家妹金大喜，平時賣魚唔專心，日日掛住做歌星，年輕人睇到應該好有共鳴。不過阿SA的角色當然唔會咁膚淺，從魚檔殺入娛樂圈，冒險過程中改變了某些人，非常勵志，不少人為大喜而感動。
發明星夢都要搵到一個有背景的人撐腰，大喜竟然搵陳小春飾演的蚊型經理人公司老闆葉夏利幫手，所以一切唔係如大喜所願咁順利，重要替他人作嫁衣裳，一直只能在舞台背後做幕後代唱。最終當然是好人有好報，美夢成真。
聽觀眾都記得大喜呢個名，證明她已經深得觀眾歡心，絕對無改壞名。