鬥大膽Boy'Z攬眼鏡蛇驚驚<br>馮仁昭四圍超:張燊悅食龍虱唔眨眼

鬥大膽Boy'Z攬眼鏡蛇驚驚
馮仁昭四圍超:張燊悅食龍虱唔眨眼

牛仔褲品牌Levi's噚日邀請咗張燊悅、Boy'Z、鄭希怡(Yumiko)同吳耀漢個仔吳嘉龍(Carl)等,喺中環Edge酒吧搞咗一個花生騷。

「唔知咁大條」
花生騷嘅主題就係夠型、夠大膽,大會為咗挑戰藝人嘅膽量,就分別安排佢哋食龍虱同蠶蟲,最特別係考驗Boy'Z膽量,要佢哋同一條六呎半長嘅眼鏡蛇合照。合照時Boy'Z嘅Kenny俾條蛇嚇到死死吓,事後問Kenny點解咁驚,佢話:「因為唔知條蛇咁大條,同埋佢用個頭向住我時,俾佢嚇親。」
最後,大會評判黃秋生見Boy'Z攞住條蛇都夠膽,就畀佢哋攞咗個至型、至大膽獎,但係講到搶鏡就非張燊悅莫屬,佢着條牛仔褲加件bikinitop披件牛仔褸就走上台,佢重好大膽咁食龍虱,連眼都冇眨過。

Yumiko俾車淑梅窒面黑
梁漢文噚日同鄭希怡(Yumiko)去港台接受訪問,主持陳百祥同車淑梅要佢哋即席寫譚詠麟個名,點知Yumiko竟然將「譚」字嘅早寫成貝,而梁漢文要阿叻提水先識寫。阿叻又踢爆梁漢文同尹志強有親戚關係,車淑梅就話:「呢行係要好多親戚關係先入到行,好似Yumiko同阿成乜都有關係㗎嘛?」同成龍傳緋聞嘅Yumiko聽到之後即黑面。之後,Yumiko話:「淑梅姐玩吓啫,呢個問題成日俾人玩,大家開心咪就得囉。」

新紮師弟三個鐘錄一句歌
即將同楊千嬅合作拍《新紮師妹II》嘅日裔台灣歌手小松拓也,最近喺新加坡錄國語唱片,佢嘅製作人要求好高,最犀利係一句歌詞竟然錄咗三、四個鐘。小松拓也個樣鬼鬼哋,好多人以為佢係混血兒,佢話自己係百分百嘅純種日本人,因為識中文,所以唔喺日本發展,反而去咗台灣做歌星,佢話咁先夠特別喎!

小春歎豬骨煲一身汗
陳小春每到夜晚就好活躍,噚日凌晨小春同幾個朋友,由跑馬地揸車去到大角嘴著名嘅良記豬骨煲消夜。由於小春係公眾人物,就算佢同朋友坐喺最角落嘅位置,都俾唔少街坊一眼認出。而小春大歎熱辣辣豬骨煲嗰時,成身大汗,要除低件外套。

甄子丹讚Twins夠勇敢
甄子丹噚日去港台接受訪問,講開佢任武術指導嘅電影《千機變》,佢就對Twins讚不絕口,佢話:「Twins唔係演員,但係好佩服佢哋,好多動作部份都係唔用替身親自上陣。雖然佢哋唔高大,同啲外國人做對手戲,都拍得好好,相信套戲出嚟會好Shocking。」

秋官否認欣宜簽英皇
鄭少秋下個月將會拍二十集無綫喜劇,佢噚日去港台做錄音訪問,對於有傳女兒欣宜簽約加盟英皇唱片,秋官話:「我問過佢啦!佢話唔係。佢自己鍾唔鍾意入行就隨佢啦!不過佢話入咗間好學校,想讀好書先,我都覺得佢好識諗。」另外,有傳秋官同沈殿霞喺黃霑演唱會上會避碰面,秋官話:「佢把聲咁響,唔好合唱喇!做節目就好。」

《佢重有冇望住我呀?》Boy'Z--Steven(左)、Kenny(右)
設計對白

吳耀漢個仔吳嘉龍噚日喺花生騷度行catwalk。

Yumiko

陳小春

甄子丹

鄭少秋