梁錦松俾電台聽眾媽到飛起，一句「有咁耐風流」，跟住「一月買新車」，都足以觸動香港人神經。今日香港人，大都既憤怒，又焦慮，怕被炒魷魚，恐懼冇得撈，所以阿松雖係無心之失，但缺乏政治敏感度，就立即俾梁師奶之列嘅聽眾狂抦。聽烽煙節目主持人講，佢哋都唔想一面倒，但罵松電話排山倒海而來，打爆兩個電台電話直線，唔接唔得，一接就直落成兩個鐘頭，可見民怨、民憤之深，其他高官局長應以之為鑑，謹慎言行！
大編輯個老友醫生M亦幾乎要罵松。三月五日宣讀預算案之日，放工時份，中環居然唔見塞車，醫生M嘅醫務所，全日只有兩個病人！醫生M喺佐敦道地王設醫務所，平時甚多病人，估唔到啲病人俾預算案嚇破膽，病都唔睇，令醫生M幾乎食白果。
醫生M本是婦科能手，近年香港婦女唔願意生仔女，醫生M嘅病人比以前少咗好多，於是啲老友勸佢「半轉行」，兼做埋美婦顧問。香港女士既唔願生兒育女，慳番啲錢，用咗唔少喺美容、瘦身、節食方面，婦科醫生若能轉型，未嘗唔可能打開一條財路。左丁山一位朋友係皮膚專家，一早睇到病人難求，攞定護膚美容文憑，果然眼光獨到，賺女人錢比賺皮膚病人錢容易得多！照沙田陳師奶睇，阿松喺鏡頭前顯示口唇乾燥、面色青黃，好應該請教吓皮膚美容專家啫！