美股大幅反彈，港股雖跟隨上升，但恒指在9000關口前行人止步，收報8956，升168點，成交57.49億元。藍籌股全面回升，中移動（941）一度急升4.4%，但其後俾歐資沽盤力壓，結果只升1.9%，收報16.20元。
市場預期中移動今年將派末期息，股息率介乎1.5-2厘，但黑客話收到風每股約0.16元，即股息率只有1厘左右，毫無驚喜之處，現時投資者似乎只對高息股有興趣，若中移動股息率太低，可能再有沽壓。
冠華國際（539）停牌話要配股集資，但暫時未聽到價錢，配股看來會由圍內人士一手包辦。據聞此股炒上主要都是為咗配股，不過前日表現有少少腳軟，配完股之後能否企得穩，好大程度要睇承配人是否夠齊心。
意科控股（943）噚日復牌果然炒上，升逾13%，收報0.275元，成交雖增至367萬元，但似乎仍未夠鑊氣，要挑戰0.30元目標價，有待努力。
近期唔少公司宣布派高息回饋股東，不過噚日最矚目莫過於阿董嘅東方海外（316），公司盈利倒退16%，每股賺10美仙，派息2.5美仙（每股19.5港仙），以阿董家族持股量65%及公司已發行股本5.17億股計，持股總數約3.36億股，即收取股息約6552萬元。
香港現時重未有針對富豪開徵股息稅，董家大可袋袋平安，阿松唔知會否被人話佢保障富豪家族荷包呢？其實相對於其他公司，東方海外派息唔算吸引，不過股價仍勁升14.4%，創3年新高，阿董家族賺息又賺價。
阿虎