入西貢，食海鮮，頗傷腦筋。
西貢碼頭勝在多古靈精怪的海鮮，怕你聽過亦未試過；布袋澳食環境，有小碼頭伸出海中心，可以聽着浪聲吃海鮮；榕樹澳魚排，即釣即蒸海上鮮，釣幾多吃幾多，吃不完還可打包走。
看畢以下推介，再看看自己荷包，想你已有心水選擇，何用傷腦筋？
「我哋有十兄弟姊妹，老爹一代是漁民，到我呢代上岸搞海鮮食肆，愈搞規模愈大。」老六偉麟，主外：「搵新款海鮮、試味、格價、訂貨，統統歸我管。」老八美芬，主內：「我口才好，拉客、分配人手、布置海鮮檔，由我負責。」職責分明，合作無間。
話童年，二人滔滔不絕，老八這樣嘲笑老六：「老爹為咗迫阿哥學游水，趁佢唔為意一嘢推佢落海，諗番起佢嗌救命個樣就笑爆嘴。」老六這樣揶揄老八：「捉蟹，俾蟹拑拑實手指，整極都唔甩，血係咁流，眼淚都係咁流。」
難忘事，亦一籮籮，偉麟靦覥地說：「有次陪老爹出海捉魚，收網，居然捉到條2呎長鯊魚，扯咗上甲板，擘大口猛咁典，咁衰前晚我又睇完史匹堡套《大白鯊》喎，唔驚就假，諗番起條鯊魚棚牙，𠵱家都重有啲驚。」美芬則說：「記得有年，阿哥喺外國引入隻唔知乜鬼螺，香港未有得賣，食唔食得落肚唔知，好唔好味又唔知，佢醒呀，叫我出聲𠱁班夥計一齊試食……」結果如何？偉麟說：「我頭暈……」美芬接着說：「我身㷫囉！」說罷相視大笑，兄妹情深。
2至4斤重硬體海星，去內臟，原隻燉湯，湯底也不賴，有淮山、杞子、圓肉、瘦肉、響螺片，味濃甘甜，有化痰止咳、治支氣管炎功效。
3至6月是螢光墨魚當造期，偉麟推介：「新品種，肚底會發出螢光，肉質比普通墨魚更嫩滑。」取其卵，簡簡單單混和雞蛋、鹽、葱絲一併煮，一魚兩食，肉與觸鬚做刺身，另加$48。
有數條專吸微生物的觸鬚，狀似鬼爪，故名之，味道似蟹柳。偉麟說：「鬼爪螺要出公海先搵到，佢哋依附喺荒島岸邊石頭，好大浪，好難捉。」
3至5斤重海鱟，食其卵，會用咖喱、辣椒、XO醬混煮成的漕池汁，味帶少辣，口感似蟹子，但比蟹子更爽脆。
夠古怪
日本人港瀨、乙黑先生異口同聲：「就係貪呢度啲海鮮夠古靈精怪。」
全記海鮮菜館（27911195）
地址：西貢海傍街53號地下
營業時間：11:00am至11:30pm
布袋澳，無疑隔涉點，老闆小高也承認：「遠就遠咗啲，交通又真係無咁方便，但勝在有Feel喎，因為我有個伸出海中心嘅私人小碼頭。」碼頭又如何？「嗱！畀埋個畫面你：入黑，碼頭燈光火着，美女在旁，喺碼頭上面開餐，佢餵你食蝦，你餵佢吔蟹，聽住浪聲齊齊歎海鮮……，呢啲咪食環境食氣氛囉！」無窮幻想，不得不服。
梅子蒸蟹（$8両）
前者用酸梅、唐醋、蒜頭、薑片、辣椒粒做芡汁，拆殼，別忘蘸這酸酸甜甜的芡汁一併吃，很惹味；後者加蛋白、雞油、花雕酒一併蒸，酒香四溢。
東北大連野生鮮鮑，每隻至少3両重，小高：「野生鮑肉質嫩滑過養鮑，齋用陳皮、薑葱清蒸，落豉油吊味已經OK。」
歎海鮮一流
不願透露姓名的熟客蟹王（左）、蝦王（右）：「遊完車河入呢度歎海鮮一流！」
海鮮島漁港（27190787）
地址：西貢清水灣道布袋澳村6號地下
營業時間：11:00am至11:00pm
食海鮮，不一定要付錢，若自問垂釣技術不俗，不妨到榕樹澳玩玩排釣，海魚即釣即蒸，這才是百分百海上鮮，老闆楊生說：「𠵱家最多黑鱲、火點、剝皮、泥鯭出沒，好運嘅話，有石斑仔、瀨尿蝦上釣，算你係初哥，5斤海魚走唔甩，食唔晒，有人幫你放血打包拎走。」
臨時興起身無裝備怎樣辦？楊太搭訕：「預咗你咁問！放心喎，10支魚竿、50個手排仔、南極蝦、沙蟲免費提供，有錢就嚟得㗎嘞！」
釣魚樂（楊生95347491）
營業時間：24小時
地址：西貢榕樹澳（碼頭有小艇接駁至魚排）
收費：$80位，1小時前預約。