末代港督彭定康真係好想做牛津大學校長，佢噚日親自喺TIMESONLINE網頁發表競選宣言，誓言一定會盡全力將牛津推上更高峯，同美國嘅哈佛、耶魯看齊，又叫校友記得投佢一票。
按照牛津傳統，十萬名畢業生都有權投票，不過佢哋要喺噚日或者今日親自返母校投票。肥彭目前嘅形勢不太妙，英國博彩公司立博（Ladbrokes）開出盤口，肥彭勁敵大法官賓厄姆勳爵勝出倍率為二點二五倍，而肥彭就有成二點五倍，形勢叮噹馬頭。
唔怪得肥彭喺宣言中長篇大論分析牛津今日面對嘅大問題──財政緊絀、冇錢做研究、受到北美大學挑戰、人才外流等等，要扭轉形勢，肥彭認為牛津嘅畢業生必須向美國長春藤（IvyLeague）出名大學畢業生學習，捐多啲錢回饋母校，而佢就負責周圍去推銷，一定會成功嘅。
傳真︰2623-9278
電郵︰