歐美股市大反彈，港股打咗強心針，恒指噚日大升168點，自然成為Call輪嘅世界。
大藍籌中和黃（013）表現最威，大升3.5%，收43.80元。周四推介嘅和黃Call輪9666，噚日升12.9%，收0.14元。買中嘅讀者當然唔滿意咁嘅升幅，皆因噚日溢價由周四收市15.22%大縮至11.64%，但玩高溢價輪要預咗正股急升時，溢價亦會跟住縮。
和黃噚日升近10日線44.20元現阻力，但9RSI率先升破短期下降軌，現時股價降軌阻力在44.50元附近，估計有機會跟隨9RSI升破。如果手上仍持有9666，不妨觀望正股下周會否上破44.50元才考慮食胡；另方面，和黃若再度跌穿42.90元，Call輪應要先計數。
中信泰富（267）業績靚兼派大息，股價持續向上，噚日最高16.65元，收16.40元。正股急升後料有調整，3月13日上升裂口16.10元至15.90不宜完全補回，若見守穩16元整固，有機會再展升浪，可以吼吓中信Call輪。
中信Call輪選擇唔多，暫以9646最可取，04年3月到期，溢價3%，槓桿率10.1%，噚日微升1個價，收市報0.162元。若正股回試16元不破，有機會上試17.40元至18元水平，可小敲9646，正股跌穿15.80元收市，Call輪先止蝕。
章盛