財爺近排嘅言行頗為受人注目，先來「有咁耐風流，有咁耐折墮」言論，跟住再來多一單懷疑避稅偷步買車事件，因而惹來唔少閒言閒語，亞Mark相信有呢啲情況出現，都係由於份財政預算案，未見其利卻先見其弊，既影響民生又不利改善通縮；事關有唔少人新納入稅網之餘，財爺對一群中產階級更係落井下石，影響所及一班中價車代理更見頭痛。事關香港汽車業時至今日，除部份口碑較佳嘅代理商，不愁旗下車款嘅出路外，其他大部份車行都以價廉物美作招徠，但響新稅制下各項設備均要評稅，無形中對二、三線嘅汽車代理增添不少壓力，試問響同級車中又怎能有突圍嘅機會呢！另外，原本三、四月間會有唔少新車抵港，既有亞Mark早前提過嘅法國雷諾，重有預計響三月中抵埗嘅歐寶Vectra同紳寶9-3，但財爺今趟行動會否打亂佢哋嘅陣腳呢？咁就真係要多睇一會喇！