將軍澳廣場來勢洶洶，打窒原本隨時賣得嘅房協怡心園，遲遲未有公布開價及開放示範單位。不過，房協並無偷懶，靜觀其變嘅同時，準備工夫亦緊密進行。早兩日先安排地產代理行於現樓售樓處劃位擺檔，昨日正值將軍澳廣場內購嘅大日子，房協就向忙到一頭煙嘅地產代理派發怡心園樓書。
樓書用青蘋果做封面，同將軍澳廣場嘅大紅色形成強烈對比。怡心園形象比較平實，就連封面都大大隻字寫住「簡單生活，最快活！」裏面資料相當齊全，包括物業基本資料，各座單位嘅平面圖、面積等，又有小朋友嘅靚相，感覺清新有朝氣。
最近樓盤好興有主題曲，樓書有頁係陳百強「有了你」嘅歌詞及曲譜，唔知係咪怡心園嘅廣告歌呢？係就幾慳水慳力。
至於幾時賣，房協就話暫時都未定，派樓書主要希望畀多啲基本資料區內代理，為賣樓做足工夫，亦等多啲市民認識呢個盤。
手提電話已是港人的必需品，重係潮流之物。事務繁忙嘅地產商，就更加唔少得。長實趙國雄嘅手電就成日唔同款，噚日喺記者會上，突然響起古董電話嘅鈴聲，原來物主又係趙生。佢最近換咗部SonyEricsson新型號P800（圖二），有齊電子手帳、收發電郵、影相同拍短片多種功能。部機水貨價都要五六千，所以話，做地產幾咁發呢。
政府鼓勵投資移民，美聯物業相信，政策對地產代理嚟講係一個商機，並準備就緒開設新部門接生意。
美聯張錦成話，初步構思成立諮詢熱線，又喺網上發放資訊，等海外買家知道最新嘅投資移民政策。佢估計，長時間居住海外嘅華僑同東南亞居民，對有關政策最感興趣。至於邊類物業最受歡迎，相信係港島嘅豪宅，因為升值同保值能力最高。
根據美聯數字顯示，住宅租金回報率一般有五至七厘，以西半山寶翠園為例，現時呎價4197元，呎租二十三元，租金回報率有六厘六，較其他金融產品高。
噚日西貢濤苑記者會散會後，大家喺對面海村搭平時好難有得坐嘅街渡，去西貢市中心，兩蚊位，船程不過五分鐘，喺風和日麗海風送爽嘅氣氛下，令蘭西憶起學生時代去旅行嘅情景。對面海村泰湖閣，唔少住客喺西貢市逛完街買完餸，都會搭街渡返歸，日後濤苑入伙，又多一條客路。
澳洲地產發展商Australand，嚟香港推銷悉尼豪宅GlebeHarbour，噚晚舉行酒會，出席嘉賓不乏太平紳士及城中名人，好似早前買咗薄扶林貝沙灣嘅林貝聿嘉太平紳士等。搞手係前港姐張瑪莉。
發展商預留二十個單位畀香港人購買，有獨立洋房、別墅及分層單位，售價由二百四十萬至逾一千五百萬港元，星期六發售，個盤早前喺澳洲已賣咗五成。
有鑽石王老五之稱嘅賽車手關兆昌，啱啱賣出揸咗五年嘅跑馬地豪宅樂景園，帳面雖然唔見咗五百八十萬，但對比呢五年嚟整體樓價嘅跌幅，都算蝕得少。關兆昌喺98年用三千一百萬買入三十八樓A單位，面積3134呎，𠵱家以二千五百二十萬賣出，貶值唔夠兩成，呎價重做到八千幾蚊，已經算好價㗎喇，唔知同天王黎明都係呢度嘅業主有冇關係呢？
蘭西
電郵地址：
