個市前日升得1日，昨日又跌過。藍籌好個別，成績表現靚靚嘅，例如中信泰富（267），逆市而升；成績表唔算差嘅，例如新地（016），則仍然有沽壓。
中信Call輪如9480同9599，打入10大龍虎榜。9480收3.3仙，升幅94%，下月初夠鐘，溢價4.2%，槓桿率49.5倍，夠鐘之前正股未除息，正股派1.70元息對佢冇影響，不過正股要升到16.70元隻輪先至唔使作廢，要升到17元以上揸隻輪先至唔使輸錢。9599收15.1仙，升18%，11月到期，溢價9.4%，槓桿率10.8倍；正股做16.35元，除息計14.65元，按除息價計，9599溢價實際係22.1%，槓桿率係9.7倍。呢組數據顯示，買9599要諗過先。當然，如果認為正股除息後會幾個月內彈上19元，則又當別論。
華創（291）周二跌落6.05元後，守穩6字大關，爬吓爬吓，爬番上6.40元，跌得太殘，幾乎見番911嗰陣低位，點都會有護盤隊伍維持秩序。吼吓華創Call輪9270，有機會搵到1盅兩件。9270今年9月到期，現價5.1仙，溢價8.9%，槓桿率12.5倍。
中信國金（183）派成績表後，股價彈升5%。中銀（2388）下周四派成績表，估計會有刺激，買啲Call輪9462可也。
章盛